گاون جوڑدیاں
جوڑ تروڑ وی جاپن لگ پوندا اے
وڈیاں سیانیاں جوڑکاراں دیاں
گھڑ ورتایاں جوڑاں دا،
کئیاں رنگاں دے تروڑ
سردے سہی ہوندے نیں چیت اچیتِیں،
سکول کالج اندر
پڑھائیاں وڈیاں زباناں
اُردُو فارسی
جو کُجھ لیپ کیتا اے اندر
اوہدا سواد تے آوندا رہندا اے
پر جو ایس لیپ دبا چھڈیا اے
اوہدی سار ونگار وی ٹوہندی رہندی اے سانوں،
جو ایہناں زباناں وِچ ورتایا جاندا اے پیا
اوہ ایہناں دِیاں
اپنیاں جُوہاں دے لوک وچار
تے لوک ورتار دی جھات
سانُوں پواندا کیوں نہیں،
لوک بولی وِچ جوڑ جوڑیندیاں
اجیہے تروڑ
سانُوں ہلُوندے آئے نیں،
جوڑیاں جوڑاں اندر سر سر
اپنے ہان دیاں پڑھن ہاراں ولوں
آس دی تک وی جگائی نیں
اندر اساڈے