وڈا شہر اے
نویں پلازے تِیہہ تِیہہ چالیہہ چالیہہ منزلے،
قلعے مسِیتاں صدیاں پُرانے
نوئیوں نویں پئے ہوندے نیں،
ہوٹل جگ تے پروَنّے وی
ایتھے سارے ای نیں،
پر ایس پکّے شہر دے دُھر اندر
اِک وڈا کُھلا میدان اے
جِتھے اِک کچا کوٹھا اے وچکار
آل دوالے ہریا گھاہ
دسدے نیں اِک درویش ہا زارا
ایہہ کچا کوٹھا اوہدا ہتھیں ساریا ہویا اے
چھت وی اوہا اے جیہڑی اوہنے دھری
کندھاں وی اوہدیاں ہتھیں اُساریاں
مندے نیں لوک
گیا نہیں اوہ کِدھرے
اجے وی ایہا ڈیرا اے اوہدا،
بُھکھا لنگھے کولوں تے رج ویندا اے
رجیا جاوے تے بُھکھ اچرج اوہنوں لگدی اے
اعلےٰ توں اعلےٰ کھانیاں نال وی اونویں دی اونویں ای رہندی اے،
منگ کھاوے اوہ بُرکی رُکھّی
کِسے ماڑے گھروں تاں لہندی اے