فرید بھنڈار

(بائیاں ترئیاں دی ہوسی ماتی تے اتنے دا ای ہوسی دوَن- اِکٹھے پڑھے نیں دوئے، تے جِتھے پڑھے نیں اوتھے ای ہُن پڑھاوندے نیں پئے- اج اِک لُگی تھاں تے سَیر لئی نِکلے نیں -)

دوَن: تُسیں گُجر ہو ماتی؟

ماتی: نہ

دوَن: ول1 جٹ؟

ماتی: نہ دوَن، جات کوئی نہیں ساڈی

اسیں تے گوپ ہوئے

بِندرا بن دے

دوَن: گوپ2 جات نہیں؟

ماتی: گوپ کار اے

دوَن: مال سمھال

ماتی: نہ دوَن- مال بنن توں ہُل3 اے مجِھیں گائِیں دی،

مجھیں دا گراں 4 سروور5

گائِیں دا پَربَت6،

گوپ دی کار موکھ7 سنبھال اے

دونہاں دی

دوَن: مدل8 کمائی دونہاں دی اے ماتی،

مدل موکھ سنبھال دا وسیلہ نہیں؟

ماتی: نہیں دوَن- مدل مچاک9 اے دونہاں نُوں گُلَم10 دی باندھے بنھی رکھّن لئی

دوَن: ول وسیلہ کیہ اے موکھ سنبھال دا؟

ماتی: سِیروری، بھنجال11، مُڈھوں،

مِلکھ دی باندھ بنے ای نہ

تیر میر دا گھیر پوے ای نہ

دوَن: آہا (نچ کے) سار باہوڑی اے ہُن،

سانجھ نہال،

پِرم پَرم ہے

ایہہ اننت ہے، انہت مُڈھ

ایہدا توڑ تروڑ نہیں کوئی

ماتی: (نِرتِیں رل کے)

نِت ناندھ انند

ہے جِیون جِیوکا،

کوئی بُھکھ نہیں

تھوڑ نہیں کوئی

1- ول: پھیر-2 -گوپ: گاواں دے سانبھنہار، چاک-3- ہُل: اِنکار، نابری- 4 -گراں: پِنڈ-

5 -سروور: دریا، سمندر-6 -پربت: پہاڑ-7 -موکھ: آزادی- 8 -مدل: سرمایہ داری، کیپیٹل اِزم-

9 -مچاک: وڈا ہتھوڑا، ودان-10- گُلم: غلامی-11 -بھنجال: سانجھ ورت ویہار-