رَتی تہمت رَتا ای چولا
پہلوان دی کاٹھی
اُرلے چَونک اوہنے لاونی ریڑھی سویرے
پیر پیر کر خالی
رات جا پرلے چَونک لیاونی
سَودا کدے نہ ہوکیا
بس ایہو اوازہ لاونا
"لالُو
وے لالُو
مر جائیں کِتھے گیائیں
آیا
بس آیا
سمجھ تُوں ایتھے ای آں"
حلوہ قُلفی شربت میوہ
رُت سِر ریڑھی رکھنا
کرنی رنگ رنگ نالو نال کہانی
"لئو جی
دُکھ مُرشد کر پیر میں چھوہے
بھیت کھولیُس اپنا
’بَھلا بجُھ کون ہاں
کیوں آوناں کِتھاؤں
جرناں کیویں کِنج مَرناں
اُتوں دُکھ ہاں
دارُو ویہاری ذات صفات پرچارن مینڈی
گھر گھر وِچھن مُصلّے
ہووے تیاری
وکھ وکھ دُکھی دُکھی نوں کر کے ’میں اِتکاف‘ بہاون دی
اُتوں دُکھ ہاں
وِچوں بُھکھ ہاں اپنا آپ گواون دی
جوڑ کے اِک خُدائی کرناں
درد نوں اصل دوائی کرناں
تیر میر دے ٹبّے ٹوئے لہاون دی‘
لئو جی
میں اُڑ کیتے ہتھ اگیرے
چرن چھوہاں مُڑ مُرشد دے
کیہ ویکھناں
ناہِیں کوئی اُتھائیں
لالُو
وے لالُو
مر جائیں کِتھے گیائیں
آیا
بس آیا
سمجھ توں ایتھے ای آں"