پڑھ سِکھ جیہڑے باہروں آ اگوان بنے
ٹوپِیاں اچکناں سُتھناں گُھٹنے پا کے
لاہ سُوٹ ادھ ننگ وکھا کے
کار اوہناں کیہ کیتی
خلق دے اندروں اُگھڑی چروکی
سہج ویہر نُوں روکن لئی
بھیت مذہب دے
کِھچ کھلار کے پاڑ بنائے،
پاڑاں اُتے لہو دے رنگ پِھروا کے
لاہے دے دروازے باراں
شہر دوالے کُھلوائے،
ہتھ جیہڑے کہیاں کُہاڑے چائی کَھلے آہے
مَلّ دبل دیاں نِینہاں اُکھیڑن کِیتے
اوہناں نُوں ڈَگے پھڑائے،
دغے دی نوبت اگے دھرا کے
چِت چیتے دے کن مُونہہ بند کروائے