اَیل سلواڈور اِک جُوہ اے
لہندے1 امریکہ وِچ،
اُتھائیں جایا2 روک ڈالٹن
سن اُنّی سَو تیتری وِچ
پڑھیار3 تھیا قانون دا
تے منس سار4 دا
اینتھروپولوجی جیہنوں آہندے نیں
ایل سلواڈور تے چِلّی تے میکسِیکو دِیاں یُونیورسٹِیاں اندر،
سن اُنّی سو پچونجا وِچ
روک ڈالٹن اپنے دیس دی سِیر5 جُوڑی6 وِچ رلیا
تے وت8 توڑ9 تائیں آہر اُتھلک10 وِچ ای جُٹیا11 رہیا
بندیاں 12 کئیں بھوگِیاں،
1- لہندے= جنوبی، ساؤتھ- 2 -جایا= جمیا، پیدا ہویا-3 -پڑھیار= سٹُوڈنٹ، طالب علم-4 -منس سار= انسانی ورتارا-5 -سِیر= سانجھل، کمیونسٹ-6 -جُوڑی= پارٹی- 8-وت= پھیر-9 -توڑ= اخیر-10 -آہر اُتھلک= اُتھل والے اِنقلابی عمل-11 -جُٹیا= لگّا رہیا-12 -بندیاں = قیداں -
کُجھ ورھے پہلوں دی گل اے
کوٹھی1 لگ گیا روک ڈالٹن
پر بھاگ2 ویکھو
دھرت نُوں ایہہ گل وارے نہ ہئی
کنبی اوہ
تے کندھاں روک دی کوٹھی دِیاں ڈَھے پئیاں
اوہ نس کیوبا ونج ڈُھکیا3،
اُتھائیں رہیا اخیر تائیں
گھنی نیڑ4 ہئی روک ڈالٹن نُوں
اپنے دیس دی نابر لہر دے نال
اپنی ست سُرت دی اوہنے کہانی پائی اے
اپنیاں کافیاں 5 وِچ،
آؤ بہہ کے اسیں وی سُنیئے،
-1 کوٹھی= پھانسی دی سزا- -2 بھاگ= قِسمت- -3 ڈُھکیا= اپڑیا، پوہنچیا-
-4 گھنی نیڑ= بہت نزدیک ہوون- -5 کافیاں = نظماں -
آئی واج اچیتی روک ڈالٹن دی،
ساہ لؤ،
سُنو تُسیں اج لہندے امریکہ دے ای
اِک دیس گواٹے مالا دے
میرے ہانی اَوٹو رَینے کاسٹِلو دی
کافی اے “اُتھلّ1 نال گل”
جیہڑے آپ ویکھ نہیں سکدے
اوہ سانُوں انھّا گِندے نیں
پر سانُوں تے دسیا ہویائے تُوں اُتَھلّے
کیویں رنگ آونی دا ویکھیدا اے،
جیہڑے آپ نہیں سُن سکدے
اوہ سانُوں ڈورا گِندے نیں،
پر تُوں اُتھلّے2 سانُوں سمجھایا ہویا اے
کیویں سُنِیدی اے ہر ہر جائِیں
نینہہ3 دی واج لچکیلی
ڈرِیں 4 بدھے سانُوں ڈراکل5 آہندے نیں،
پر سنگ تینڈے
اساں ہنیر6 نال کر کے اکھیاں چار
تک7 اوہدی وٹا دینے آں،
دوشاں 8 رُدھے9 سانُوں آہندے نیں دوشی10
پر تینڈے سنگی ہو اسیں
آس جگائی آونے آں
دوش نُوں مُڈھوں مُکاون دی،
سریر11وست12 کر اسیں بزاریں نہیں دھریندے
بھُکھ دے جھرنے13بند کرینے آں،
دمو دم پئے دینے آں
اکھاں
جِبھاں
1 -اُتھَلّ= انقلاب، رَیوولُوشن- 2-اُتھلّے= نی اُتھلّے- 3- نینہہ= محبت، عشق-4-ڈریں = ڈر وِچ-5 -ڈراکل= بُزدِل- 6-ہنیر= 1) ہنیرا، 2) ظُلم، دھکا- 7- تک= تکنی، نظر، اُمید- 8-دوش= گُناہ- 9-رُدھے= رُجھے، مصروف- 10- دوشی= گُناہگار، گُناہی-11- سریر= جِسم- 12-وست= وکاؤ چیز، کموڈیٹی-13 -جھرنا= جِتھوں کوئی شے جَھرے-
رُوح، بندِیکی1دِلڑیاں نُوں،
جاتاں نسلاں قوماں دے گُنجھلیں 2پھاتے3
سانُوں بندیائیوں 4واہنے5گِندے نیں
پر رل تینڈے نال اساں ماکھ6دفنینے آں
اوہدے جُگاں پُرانے گورستانے
بھاک نگر7دے باہر،
سانُوں بڑا کُجھ کہندے نیں
تے آپ بھُلائی بہندے نیں
کسُرتی8اپنی نُوں،
نہیں نیں سار
جو بھَلکے اوہناں دیاں پڑدوہتڑیاں پڑپوتڑیاں
انند مگن ہو
جگ مگ کردے تاریاں ورگے
1- بندِیکی= بندیاں دی، عام خلق دی- 2- گُنجھلیں = گُنجھلاں وِچ-3 -پھاتے= پھسے ہوئے-4- بندیائی= انسانی ہوند-5 - واہنے= خالی-6 - ماکھ= نفرت-7 - بھاک نگر= پریم نگر-8- کسُرتی= بُری سمجھ-
ناں تینڈے دیاں اکھراں سنگ1
عِشق رچاؤنا اے، اُتَھلّے!
1 -اکھراں سنگ= حرفاں نال-
روک ڈالٹن بارے گل تے اَوٹو رَینے کاسٹِلو دی کافی منتھلی ریویو پریس دی چھاپی “لَیٹن امَیریکن رَیولُوشنری پوئیٹری” وِچوں نیں -