فرید بھنڈار

‘‘تُوں جایا پَنڈتاں دا

بَھجن دُوار بھنڈار جیہناں بُھگتائے

ٹھاکر ٹھگ پُچائے

تان تینڈی وِچ اُترے کِویں

غَدری سَنکھ وجیندے جوگی سَنے پہاڑ پہاڑوں 

کِتھاؤں آن وڑے

تال تینڈی وِچ اَن چڑھیاں سُرجاں دے پَیر دھمالی

تُوں جایا سیٹھاں دا

جیہناں سَستا سَنیا مہنگا ویچ سُنایا

کِنج واج تینڈی وِچ دِین2 دِلاں دا چڑھیا روہ سمندر

کن کَندھیاں دے رنگ محل جَیں ڈھائے

تینوں خاں صاحباں دی گُڑھت گھرانے داراں دی

در درواجے3 قینچی سُوئی تھئے نقارا تُوتی

پہر شہانے ویتر اوہناں خلقت نُوں پہرائے

تان تال دے کاڑھے روغن

راجے مِیر مَڑھے4

سینے تکَم جَڑے

وَت نَوبت نویں جہان بَنن دی وج گئی واج تینڈی وِچ کِیکن

تان تینڈی کِویں تَن مساناں وِچ گُھکا گئی بِرہا دی سُلطانی

کِنج لا گئے تینڈے ڈھول جو میلے اجے لگنے نیں

وساکھ جو آونے نیں

کِویں اوہناں وِچ بھنگڑے پا گئے سُر ہتھ پَیر تینڈے

کِویں دینہہ رات اُلٹائے

بول بول وِچ مَر جِیوُں کے تُدھ بھیت سجن دے پائے’’

‘‘میاں دس کِویں سُناواں 

مَساں پنج سَت ورھیاں دا ہوساں 

پیو مینڈا سادُھو تھی

ٹُر گیا چھوڑ اَسانُوں 

میں ماں اپنی لئی بُوہے بُوہے گَوں مدھوکر5 جوڑی

تدوں جیہڑِیاں واجاں باہروں آئیاں

جیہڑِیاں اندروں اُٹِھیاں

میں میل اَن میل رَلائیاں

ایتنی گل اے

مینڈی کیتی آکھ لؤ یا آکھ لؤ جُگ بیتی

1- پنڈت اوم کار ناتھ ٹھاکر (جگ جاتے گائیک-2- دِین: کنگال، بے وسیلہ-3- در درواجے: پرانیاں باتشاہیاں ویلے شاہی نقارخانیاں وِچوں پہراں گھڑِیاں دے نقارے وجدے سن تے گوئیے سازکار ویلے دے راگ وجاوندے سن-4- مڑھے: مالش کیتے-5- مدھوکری: روٹی جیہڑی فقیر رنگ دا اناج جوڑ کے پکیندے نیں - مدھوکری مدھ توں ہے شہد توں - ایہہ روٹی ایویں جُڑدی اے جیویں مکھی ماکھی جوڑدی اے-