"سَوندے کیہڑے ویلے او ماسی
کِچن چلیندے او دِنے
تے راتیں مَل مَل کپڑے تناواں بھردے او
اُٹھ تہجداں پڑھدے او پِچھلے پہر
گھنٹہ گھنٹہ سِر سجدے
لک سِدھا کیہڑے ویلے کردے او
کوئی سانوں وی دیو نا سِیس ویہل کدے ہووے تے"
"ہا مُنڈا مراسی کُڑئیے
طبلہ بڑا کھڑکاوندائے
ڈھیر کماوندا ای
نال بہہ گُوڑھیاں تیرے پاوندائے
چَل کَل کلمہ پڑھاواں تینوں، کیہ آہنی ایں
وس گھر ایہدے کُچھڑ کھڈا ست لال
جیہدا جیہدے تے دِل آیا
جیہنے ساتھ نبھایا جِس دا
اوسے نال اُٹھایا جاسی حشردیہاڑے"
"بس ماسی ایہا سِیس ڈھیر اے
حشر دیہاڑا ای وارے او سانوں
اساں اُٹھنا ای جھاڑُو نال"