تاکی وِچوں اُلر اُلر باہر کیہ ویہنائیں کاکا
خسخاسی والا کِھج کے بولیائے
سِدھا ہو کے کیوں نہیں بہندا
سٹ پھیٹ لوانی آں
چُڑ مُڑ جھگے والا ایانا اوہدی گل نہیں گولدا
تاکی وِچوں اُلر اُلر ویکھی جاندائے
اوئے کیہ اے تینوں
سِدھا ہو کے نہیوں بہنا تے اُٹھ کھلو ایتھوں
چُڑ مُڑ جھگے والا ایانا سِدھا ہو کے بہہ گیائے
آپنی تھاں کسیا گیائے
جیویں کوئی گالھڑ مر گیا ہووے
اوہدیاں نویاں نویاں اکھاں پُرانیاں ہو گئیاں نیں
اِک پاسے تکی جاندیاں نیں
ویہندیاں کُجھ نہیں
بس اگلے سٹاپ تے اپڑی اے
کُجھ لتھے نیں کُجھ چڑھ گئے نیں
چُڑ مُڑ جھگے والا ایانا ہولی ہولی ہنگلاون لگ پیائے
سہجے سہجے اوہدا سِر خسخاسی والے دے موڈھے اُتے جا ڈگیائے
اُٹھ کے بہہ ہُن آپنے بھار سِر کاکا
شاوا چلدی وِچ نہیں سوویندا
تَرے واری خسخاسی والے کاکے دا سِر سِدھا کیتائے
اوہدا کچیچی وِچ جباڑا کسیا گیائے
پر موئے گالھڑ تے وَس نہیں سُو چلدا
خسخاسی والے نوں میں آکھناں
ساڈے جوگا باہر وار ہُن ویکھن والا کُجھ نہیں بھائی جی
رزم رزم کر ساڈیاں وڈیاں جیہڑے پتھر جوڑے
اوہو چٹدیاں ساڈیاں اکھیاں پتھر ہو چُکیاں نیں بھائی جی
جیہڑیاں شیئیں اساں نہ تکیاں
ایہہ تاں ویہندا
کھرویاں رُکھاں دے کُولے پتر
جھکھڑاں اندر لور اُڈاری اِلاں دی
دِن دے تانے وِچ اُنیندا کالا پیٹا
جیہڑیاں گلاں اساں نہ پُچھیاں
ایہہ تاں پُچھدا
سڑکاں اُتے جاندے لوکیں اِکدوجے نال ہسدے کیوں نہیں
وڈِیاں وڈِیاں کوٹھیاں اندر بندے ٹاویں ٹاویں کیوں نیں
بُہتیاں بتیاں والی سڑک تے ڈر کیوں بُہتا لگدائے،
ایہدا بھائی جی حالے سون دا ویلا نہیں سی ہویا
ہُن جیہڑے کویلے سوں گئے اوہناں نوں جاگ کویلے ای آونی اے
بس اگلے سٹاپ تے اپڑی اے
خسخاسی والا جاندی وار دی تکنی وِچ مینوں آکھ گیائے
ویہل ہوندی تاں تیرے نال وی نِبڑ لیندے پُترا