فرید بھنڈار

چُلھ بھیتاں دے اسیں بھیتُو1 نسبی

مَت مُتنج حلیم قورمے

تاء کوابی کوفت شورمے،

دیگڑ پکواناں دے کسبی

تیرے جیہیاں اَلّھڑ ہزاراں 

رِنّھ بھُنّ سرکاری دستر خوان وِچھائیاں،

بُرک تبرک وِچ رلا کے

کوٹھو کوٹ پھرائیاں،

اِک توں موچن اُتوں چُنّی

دِسن نہ تینوں ساڈے سرمچو

دھریں آر ساڈی دھن دُھنی رکھ اِکوائی2 اپنی تے

اُتوں الّھڑ

اصلوں ملّھڑ،

تک سُناویں آئے گئے نوں 

''ویکھو نا وِکدے

سِری کھروڑے چربل کھلڑی''،

گلی بزارے

وِچھے پئے نی سُوئی سلسلے

پڑھے پڑھائے دھاگے سُراگے3 ساڈے،

چڑھی ایں ہیٹھلی اُپر کرن تُوں 

ہاٹو ہاٹ تے گھاٹو گھاٹ نی تھان اساڈے تھانے،

ویکھنے آں نا لنگھدی اے کیہڑے راہوں تیری

چُچّ موچ اسواری

1- بھیتُو= سُراغ لین والے، سُونہے، جاسوس، سُراغ رساں –

2-اِکوائی= لوہے دا اوزار جیہدے اُتے دھر کے جُتی گنڈھی کُھرچی جاندی اے-

3-سُراگے= سُراغ لین والے، سُونہے، جاسُوس، سپائی-