وار دات1
]فروری سن چھتالی اُنّی سو،
رائل انڈین نیوی دا جہاز،
ترے سپاہی کَموں ویہلے تھی کے
بیٹھے گلاں پئے کریندے نیں [
پہلا: ویکھو نا یار
تریوے اسیں سپاہی تے تریوے بُوٹے،
تُوں بُوٹا سِنگھ
میں بُوٹا رام
تے ایہہ بُوٹے خاں
بُوٹے خاں: میرے وِچ تُسیں دوئے ہوئے
بُوٹا سِنگھ: اسیں رلے جاں دوئے
تاں تُوں ہوئے
بُوٹا رام: ول میں تُوں دی ایہہ ونڈ وکھرپ کیہ
بُوٹا سِنگھ: ایہہ نہ ہوندی تے گورا راج کیویں آوندا
بُوٹے خاں: گورا نہ ہوندا تے کالا ہوندا
بُوٹے خاں: ایہہ تیر میر ای سِراں تے راج بہاوندی اے، دَھوناں اُنڈیاں کرا کے ساتھوں اپنے آپ دا نہ ہوون منواندی اے
بُوٹا سِنگھ: چلو دَھوناں سِدھیاں کرئیے تے سِراں توں بھار راج دا لاہیئے
بُوٹے خاں: ستّر جہاز نیں نیوی دے
بُوٹا رام: ایہہ مگر جیہڑا ساڈے آوندا اے پیا اوہدے وِچ وی ترونہہ ناواں دی اِکتا اے
بُوٹا سِنگھ: آہو دَولت خاں، دولت سِنگھ تے دَولت رام
بُوٹا رام: دو لَتّاں تے ہر کول نیں، ہور کُجھ وی نہیں
بُوٹے خاں: ہور کیہ ہونا اے
دو لتّاں اُتے کھلو کے جہاز وگائی آؤ، تے بھوئیں تے جو گڈیا وڈھیا اے لگدیاں لانیاں تُہاڈیاں اوہ گوریاں دے ویڑھے لاہی آؤایہا کار ہوئی نا ساڈی
1- وار دی دات: وار (ہسٹری، تاریخ) دی دین، تحفہ-
بُوٹا سِنگھ: اِکو ای لَت راج دی کھا کے،
بُوٹے خاں: ستراں جہازاں وِچ ایہو ہُل پئی اُبلدی جے
جھاکی 2
]دو دیسی افسر جہاز دی چھت تے پِھردے گل پئے کریندے نیں [
دولت خاں: لے وئی دولت سیاں، سینتر ہو گئی او جہاز نمبر اِک توں - بُوٹ اوہناں لاہ ککیاں سِراں تے مارن دی دھار لئی اے
دولت سِنگھ: خان یار میری جاچے سانُوں بُوٹ اپنے اوہناں دیاں سِراں تے وگاون دی لوڑ نہیں - اسیں ڈِھڈ اپنے دے ہَٹ نُوں جندرا لا کے بہہ جانے آں - ایہو ای کم بنا دیسی ساڈا
(دولت رام ٹہلدا آ رلیا اے)
دولت رام: کیوں وئی کِتھے مُکائی اے تُساں دونہاں (دولت سِنگھ اوہدے گل وِچ بانہہ پاوندا اے)
دولت سِنگھ: رامُو مُکائی کدوں - اساں تے سُن کے اِک نمبریاں دی اگانہہ ودھائی اے- تریہاں جہازاں توں ہاں آ گئی اے، رہ گئے چالیہہ- رہنا تے اوہناں وی کوئی نہیں پِچھے
دولت رام: ایہا تے دساون آیاں تُہانوں - چالیہاں ولوں پنجاہی ہاں جے
دولت سِنگھ: بس کم اساڈا سریا کہ سریا
دولت خاں: چلو کندھی تے بہہ ویہنے آں، جاپدا اے لوکاں اِک تھی رل اُٹھنا اے ہُن
جھاکی 3
]بمبئی دی کندھی تے جہازاں توں لتھے سپاہی تے دیسی افسر مِلے نیں سِیرور نیتک کمیراں نُوں - دولت رام تے بُوٹے خاں بیٹھے ہوئے نیں اِک بنچ تے- دو سِیرور کمیر آئے نیں، ساہویں بہہ گئے نیں [
اِک: ناں اے میرا کرم رشید- نال نیں ساتھی امرداس- اسیں بمبئی دی سِیرور ڈھانی ولوں آئے آں
امرداس: تُہاڈے کم نے لوکیر دے اندر نویں جُڑت رچائی اے- جُڑت ہے تے پُرانی- پر انگریز حاکماں اوہدے اندر اپنی چترائی نال کُجھ پاڑ وگائے ہوئے آہے- تُہاڈی کرت نے اوہ مُکا دِتے نیں
کرم رشید: خلقت رل نِکلی اے شہروں وی تے آل دوالِیاں وستِیاں وِچوں وی- جاپدا اے گورا راج چلاونہاراں دے پیر پئے اُکھڑدے نیں
دولت رام: پیر اوہناں دے اپنے تے آہے کوئی نہ- اوہ تے کھلوتے ہوئے سن فوج دے سِر تے- جدن فوج دے اندر اوہناں نُوں نابری سہی ہوئی تے اوہ بے تَھوہے تھی گئے
بُوٹے خاں: ہُن ایہہ زِویں اوہناں نُوں چُبھدی اے پئی- اوہ اِتھاؤں نِکلن دی کاہل وِچ نیں - اوہناں نُوں 1857 تے 1919 ہویا دِسدا اے اجوکا ویلا
دولت رام: پَیراں دا زِویں نال لاگ پیار دا ہووے تاں ای کَھلدے نیں نا اوہدے تے، کھلدے ای نہیں رنگ رنگ دے ناچ نچ کے موج مناوندے نیں - دھرتی دی پریتی ٹوہ ای پَیراں دا ست اے- انگریز حکومتیئے اپنیاں پَیراں دا ست گوائی کَھلے نیں - ایہہ قبضہ گیراں نال ورتنی ای ہوندی اے- قبضہ گیری اوہناں نُوں اپنے آپ توں اوپرا کر دیندی اے- سو دھرو دھکے والا روَیہ اوہناں دا وِجوگ دا روگ اے
بُوٹے خاں: ہوراں دی ہوند مُکاون دی ہوس ای ایس روگ دا اَوہر اے
(ساہمنے ساری تھاں خلقت اِکٹھی پئی ہوندی اے تے ”ختم ہوا انگریز راج“ دا نعرہ دمو دم زور پیا پھڑدا اے- بنچاں توں اُٹھ کے ایہہ جی وی اِکٹھ وِچ رلن لئی ٹُر گئے نیں)
جھاکی 4
]لہور ریلوے سٹیشن- اِک گڈی آ کھلوتی اے- اندروں اوہدا گارڈ نِکل کے پیا کُوکدا اے[
گارڈ: لہہ جاؤ، اوئے لہہ جاؤ، ایہہ گڈّی ہُن کِتے نہیں جانی
(گڈّی وِچوں بُڈھڑے گبھرُو مائیاں مُٹیاراں تے بال تُرت ڈھل ڈھل کے گارڈ دوالے اِکٹھے پئے ہوندے نیں (–
چِٹی داڑھی والا باوا: کیوں گارڈ صاحب، کیہ بنِیاں نیں ایس گڈّی نُوں
گارڈ: انگریز پئے جاندے نیں ایتھوں - ایہہ گڈّی سِدھی کلکتے جانی اے- اوتھے وی کھلونی کوئی نہیں - سنے سوارِیاں سمُندری جہاز وِچ سرک جانا اے ایہنے- تے جہاز اوہ لے کے ایہنوں انگلینڈ ٹُر جانا اے
اِک گبھرو: تے آپے ای وگ ویسی ایہہ ہُن کلکتے؟
گارڈ: ایہدا دیسی ڈرائیور وی لہہ گیا اے تے گارڈ تے میں ای ساں نا- آوندا اے انگریز ڈرائیور، تے مگرے گورا گارڈ وی
(اِک اِک دو دو کر کے کُجھ انگریز جنے گڈّی وِچ بہہ گئے نیں - اِک گورا ڈرائیور اِنجن وِچ بہہ گیا اے تے انگریز گارڈ وی اپنے ڈبے وِچ- گڈّی ہولی ہولی ٹُردی تیز ہو نِکل گئی اے)
دُوجا گبھرو: خبر چروکی اپڑی لگدی اے، ساڈے پاسے تے لوک گھرو گھر جا کے مِلدے سن پئے، مبارکاں دیون لئی اِک دُوجے نُوں - اِک دو گھراں وِچ چُپ وی سی
باوا: اوہ وی تے نیں نا جیہناں انگریز دی چھاویں نوکری کیتی تے اوہ وی جیہناں کار وپار چلائے
گبھرو: آہو جی، ویکھو نا ہر ہر جائیں چھاونیاں تھانے تے دفتر- چَونکاں وِچ سپاہی ٹریفک ڈکدے چھڈدے نیں بانہاں دے جھنڈے ہلا کے، تے اوہناں بانہاں نال ای لنگھدیاں گوریاں نُوں سلُوٹ وی ماری آوندے نیں بُوٹ کھڑکا کے
اِک مُٹیار: سُنیائے گاندھی پٹیل تے جناح نے ٹھاکیا اے نیوی والیاں نُوں، اپنی ڈیوٹی تے رہو، قانون دا ادب کرو
باوا: لِیڈراں دی لِیڈری تاں ای ٹِکدی تے پسردی اے نا جے ہِندو مسلمان دا ٹاکرا ٹُھکیا رہوے تے
گارڈ: سٹیشن دیاں قُلیاں وِچ تے سارے ای نیں، ہندو مسلمان سِکھ تے عیسائی- پر اج کوئی اگانہہ نہیں جے ہویا صاحباں دا سامان گڈّی وِچ دھرن لئی- اوہناں آپ ای اپنے بیگ ٹرنک ڈاہے نیں ڈبیاں وِچ
(نال کھلوتا اِک قُلی بانہاں چا کے دھمال پاون لگ پیا اے تے دُوجے گاون جھوہیا اے:)
قُلی: اساں بھار بگانا ہُن نہیں چاونا
چایا سِراں توں لاہ وگاونا اے
اپنے بھار دِیاں پُھل ہوائیں
لے اسانوں اُڈدیاں ہُن پئیاں نیں
قُلی (اِک پریوں): اساں ہُن لال فوج ہاں
ساہاں دی سانجھ نال
مانجھ کے جگ نُوں
لالو لال کرانا اے
قُلی (اِک ہور پریوں):
لعل ہو اِک دُوجے دے گل اساں
لگ جانا اے
(پورے سٹیشن دے قُلی رل کے قوالی کردے تے نچدے نیں - چھابیاں ریڑھیاں والے وی بھانڈے وجاوندے نال رلے نیں - گارڈ وی نچدا جا مِلیا اے- ہور وی ریل ملازم، افسر، چپڑاسی نِکل کے اندروں گاوندے تاڑی وجاوندے باہر آ گئے نیں)