میں تہاڈے جِڈا ہوندا ساں
تے راتیں اِک واری گھر دے اندروں رولا پے گیا
سپ اوئے سپ اوئے سپ
سارے سوٹیاں ڈنڈے پھڑدے ننگے پیریں اندر نٹھے
میں وی نٹھا
"اوہ گھڑونجی تھلے وڑیائے"
"ایتھے؟""نہیں نہیں اودھر اوس موتیئے ہیٹھاں"
"نہ نہ اگانہہ نہ جانا"
"کِڈا سی؟""ہائے توبہ ایڈا موٹا تے لم سلما"
"کالا کوڈیاں والا"
"انج پرچھاویں وانگر نکل گیائے"
"اوہ جے مار اوئے رکھ کے"
"کتھے""کتھے""کوئی نہیں""آ جاؤ کوئی نہیں"
میں آپنے میئیں نوں پُچھیا میاں جی سپ کیہ ہوندا اے
میرے میئیں نے آکھیا کاکا سپ نہیں ہوندے کوئی
سپاں دے پرچھاویں ای ہوندے نیں
سپ جیوندا جاگدا کدی کسے نہیں ڈِٹھا
ایسے لئی اوہدا ناں نہیں لئی دا
کِتے سچی مچی نِکل نہ آوے
ناں اوسے چیز دا رکھی دائے
جیہدی اُٹھدیاں بہندیاں اندر باہر آوندیاں جاندیاں لوڑپوے"
تُسیں ایویں کھیہڑے پے جاندے او
ایہہ کیہ اے تے اوہ کیہ اے