اجے چونہہ ورھیاں دی ہوئی نہیں گوکی
پر چڑیا گھر ہن جاندی کوئی نہیں
پچھلی واریں گئی تے اوتھے باندر نال کھلو کے گل پئی کردی سی
لاوڈ سپیکر بولیا ''بچی چار سال کی گم ہو گئی ہے
لال فراک ہے لال ہی سینڈ جس کو مِلے وہ دفتر میں پہنچا دے شکریہ''
ہُن روز میوزیم آہندی اے چلو
دو اسیں ہونے آں ٹکٹاں تِن لیندی اے
''اندروں نال کوئی ساڈے باہر جے آونا چاہے تے آ جائے''
وکٹوریا اگے ٹھہر کے پُچھدی اے کون اے''
میں دسناں ''ملکہ اے انگلینڈ دی''
کہندی اے ''اچھا جیہڑی سنیائے مال روڈ تے رہندی سی
جتھے ہن قرآن شریف اے اوتھے پہلے بہندی سی''
ہاتھی دند دے گہنے کپڑے باتشہاں دے، کُڑتے لوہے دے، تلواراں
ویکھ کے آہندی اے
''سبھ کجھ لاہ کے ایتھے گھل دیندے نیں باشے
تختاں اُتے ننگ مننگے بہندے نیں؟
لوکیں اوہناں نوں کیہ کہندے نیں؟''
(''بادشاہ'' اجے آکھ نہیں سکدی
گوکی ''باشا'' ای کہندی اے)
گورنر ہاؤس دے اگوں مُڑدیاں پُچھدی اے گوکی
''ایتھے رہندائے کوئی؟''
''ہاں پنجاب دا باشا'' میں دسناں
''ویکھن چلیئے'' شوق نال آہندی اے
میں دسناں ''اندر جان نہیں دیندے''
''ننگا ہونائے نا'' کن وِچ کہندی اے
مُڑ سوچیں پے جاندی اے
''رہن دیو
آپے موزیم آ جاویگا ویکھ لواں گے''