کُتا مونہہ کھول کے ساہ لیندا مینڈے کول آیائے
رُکھ ہیٹھ میں بیٹھا سُنگڑ گیاں
اوہ ہور اگیرے ہویا اے
میں ڈر کے تراہیائے
اوہ کَھلا مینوں ویہندا اے میں وٹّا چایائے
اوہ پریرے کَھل کے
مُونہہ ہوا وِچ کر کے بھونکیائے، ٹُر گیا اے
کُجھ چِر مگروں پِچھے میں ویہناں
کنڈ نال کنڈ جوڑ کے بیٹھا اے
میں دَڑ وٹ گیاں
جے ہلاں تے ایہہ خبرے کیہ کر جاوے
پر نال ای سوچ بگانی جیہی کولوں لنگھ گئی اے:
گلّاں جیہڑیاں پُرانیاں سُنیاں
سچ ای ہون متے
ایہنوں میرے کولوں ڈر نہ ای آوندا ہووے
لِکھن پڑھن نُوں کل تے پا کے اُٹھیاں ملکڑے
اوہ وی نالے اُٹھیائے
ادھ پیر اگے اگے ٹُریائے
جیویں راہ پیا دسدا ہووے
میں اِکدم مُڑیاں پہاڑی چڑھیاں خبرے لہہ جائے مگروں
اوہ پرت کے ویہندائے، ٹَپ کے اگیرے ہو پہاڑی چڑھیا اے
مینوں ہُن اوہدی بھونک دی سمجھ لگی اے
اکھے “ سُنو سارے
چارے کُوٹ سُنو
ایہہ بندہ جُون، سمجھاؤ ا یہنوں کوئی”
اوہ اگے میں مگر پہاڑی لتھے آں
پرے بینچ تے یونیفارم وِچ
نسیا سکولوں جوڑا بیٹھائے
وارو وار لفافے چوں کُجھ اِکدوجے دے مُونہہ وچ پاؤندائے
لاہ تصویراں اپنیاں ویہندائے
کُڑی کُتا ویکھ کے چِیکدی لتّاں اُپر کر کے بہہ گئی اے
مُنڈا ہسیائے
میں اجھک کے مُسکیاں
گُھور کے پُچھدی اے “کیا ہے”
میں جَھکدا آہناں “میرا نہیں”
اوہ سِرجیہا چھنڈدی اے نک پُھلا کے
میں بھیڑا پے کے ٹُر پیاں
کُتا کِتھے گیائے؟
میں گھاہ وچ لُکدی ڈِنگی ڈنڈی چھڈ کے ٹریک تے چڑھ گیاں
گارڈ پرانا آہندائے
“صاحب جی تسمے بنھ لئو”