وانساں نُوں کر ونجھ کٹاراں
چِیرے نیئیں دے نِیر تُساں،
گڈ پیر اوہناں دے منڈپ اُسارے
تِتھے کٹک اُتارے،
سٹیج مچاناں توں
چانماری تُساں کیتی آتر رِدیاں تے
چَتر تِیر تقریر ورھائے،
نَر چودھر دے جھنڈے پھڑا تُساں وانساں نُوں
اپنے ہنکار ہِڑائے،
سار اچیتی اندروں تہانوں ٹُنبدی اے،
جِس دم چڑھی ہنیری
تھکّے تن مَڑھ وانساں بِسنتر ہونا اے،
بھرم سواہ کر مِلکھاں دے
مانجھ ہِیناں دے بھانڈے1 ایہناں دھرنے نیں،
1- بھانڈا= اوہ سکت جیہڑی اکھ کن نک جِیبھ ہتھ دی پوہی نُوں چِت وِچ دھر کے اوہنوں سُرت دا انگ بنیندی اے-
آپوں تھی ونجھلی ایہناں خلق بُلاں نُوں ٹوہنا اے،
ایسے سہنسے
دھرو دھگان دے کار تُہاتھوں
آہر ویہاری ووضو کر کروائے