رقبہ گھٹ گیائے
ونڈیا گیائے شرِیکے پاروں
گھر دے دانے ہو جاندے نیں،
باقی بکرے پال میں لَیناں خاص نسل دے
خاص خوراک تے،
وڈی عید تائیں
ڈھو جاندے نیں سال دا خرچا،
مصیبت ایہو اے
کدے کدائیں پال سمھال وِچ پیار وی پے ای جاندا اے
پچھلی واری ہو گئی ایہہ کُجھ بہتی سمجھو
میں ناں اوہدا منجو رکھیا ہویا ہا
پٹھے کھاوے تے ہتھوں میریوں کھاوے نہیں تے بُھکھا ای رہے
تکے بولے مُونہہ گوڈیاں وِچ دھرے
عجب جیہی اپنَیت بنی
منڈی لے کے چلیاں تے سوچاں
ایہنوں رہن دیاں
مُڑ پکا دِل میں کر کے آکھیا ایہو تے ہے قُربانی آل اولاد والی
پیسے اوہدے پھڑے تے ہاسا اپنے آپ تے آیا
ہاسا ہا کہ رونا
کیہ فائدہ سوچن دا