بھائی عاشق بسم اللہ کیتی
‘‘آئس کریم میں پہلوں کھا کُھو لیناں
کھروڑے پِچھوں
لوکاں نوں اجکل ناں ای نہیں آؤندا
‘پائے’
یُہائے، کھانا ایہناں نے کیہ اے میرا
ہارٹ اٹیک جے ہونائے ہونائے
اگوں کھا لؤ پِچھوں کھا لؤ
مِٹھا پہلوں پھیر کھروڑے جیہڑا اصول اے
مونہہ خراب کراں میں
کھان پِین نال کُش نہیں ہوندا
ہوراں گلاں نال ہوندائے بھائی جی
ایس میز نوں بنیاں ویکھو تیہہ سال اج ہو گئے جے
ایہہ میز اوہ سائڈ بورڈ
ہتھ ویکھو
کسے اربُو کھربُو کول ویکھا دیو مینوں
جیہنے بنائے اج دے دِن ای پِچھلے سال اوہ سِر وِچ گولی مار کے مَر گیا’’
بھائی عاشق جَھٹ اَجھکے
میرے مونہہ تے گل دا اثر پڑھن لئی خبرے
‘‘دفتر پِئین سی میرا، گھر ترخان سی
بس میں اوہنوں کلب دا ٹھیکہ لے کے دِتائے
سمجھو گیس نوں تیلی لگ گئی
ہُن وائٹ ہاؤس تک بانہہ سُو
ہتھ دے کم دا تہانوں پتہ اے گورا نواں سُدائی ہویا
سی تے پرانا وی ذرا ہتھ گُھٹ سی پر
ٹوکیو لنڈن برلن جدہ
تھلے لتھا ای نہیں اوہ
مُنڈے باہر پڑھائے کُڑیاں باہر ویاہیاں
لہور جدوں وی آؤنا
میرے ساہمنے کُرسی تے نہیں بہنا
پچھلے سال وی آیائے
ٹھیک ٹھاک سی پچھدا کیہ میں
گولی مار کے مرن دا کدوں پروگرام اے؟
ہتھ ویکھو تُسیں
ہتھ چَلیا سو وِکیا بھائی جی جو وِکیا سو چلیا
ویکھ لؤ
اسیں وی شاعر ہوندے جانے آں تہاڈے نال اُٹھ بیٹھ کے
لؤ نہ پکوڑا
تہاڈے لئی بنوائے جے سادے
آلو مرچ بتاؤں یُہاؤں نوں تُسیں پکوڑِیا نہیں نہ مندے
میں وی نہیں جے مندا سچی جیہڑی گل جے
ویسن ہگی آوندے جے اجکل وِچ کڑاہی دے
سادا پُھل کوئی کڈھ کھواوے دِل دینے آں بھائی جی