اگلیاں ویلیاں وچ آہندے نیں
پوہ چڑھنا تاں شہر لہور وچ ککّر کورا پینا
پتراں دے بھروٹے چِٹّے تھی وَینے
اج وی سوڑیاں گلیاں اندر وِرلا وِرلا
کِتے ہے پالا بُکل دا
کُھلیاں سڑکاں اُپر دُھند نہیں
دُھندُوکار ہے
چِٹ بھروٹے کیتی کھلے نیں میک اپ کالا
مِستر خانے تتّا دھواں
چِبّے بمپر ٹھوکدیاں بالاں دے سینے سیکن دا کم کردا اے
فِلم پارک وچ بندی اے پئی
درجن نڈھے کوٹاں ٹائیاں والے کھلوتے گاؤندے نیں :
"آج موسم بڑا بئی مان ہے"
لنگھے کُڑی کوئی جِبھ لمکاندے اوتل اَکھ مٹکاوندے نیں
"مونہہ طرف کیمرہ شریف"
ڈریکٹر کُوکدائے،
دھوتیاں ٹُنگی پنج ست بُڈھڑے جوگِنگ ٹریک نوں غسل دیواوندے نیں
سِر صافی ہواڑ دی ول کے،
ٹوپی والی جیکٹ لُکیا میٹ1 اوہناں دا
اگ سیکدائے بنّے
اک سپیادا
کالی داڑھی
سِر پٹکا گل چولا
گارڈ دی مُٹھ وچ سائی مُلاحظہ دھر کے اندر وڑیائے
ہتھ اپنے تے متھا ٹیکدا
بال ناتھ دا چیلا نویلا جاندا اے
من ہانڈی وِچ ٹھریا بیٹھا سپ رزق دا
جھوٹھیاں سچیاں بِیناں اگے سِر سُر مار ای لیندا اے
-1 میٹ: مزدُوراں دا جمعدار-