ونگار: شپے خاں جی
اج ورھے پِچھوں تہاڈے تھڑے تے آئے آں
شپا: تُوں روز مِل، پر نہ میں خان آں
تے نہ ای تھڑا ای میرا اے
ونگار: کیہدا اے ایہہ تھڑا؟
شپا: بھوئیں دا
ونگار: مینوں اپنا آپا چیتے کرایا ای،
تیر میری نُوں گلوں لہاون دی کار
پئے کرینے آں پِنڈ وِچ، شہر دا بُوہا لنگھیا ای اے
تے آپا گواچ گیا اے
شپا: ایسے لئی تے شہر نہیں بنے؟
ونگار: آہو، جے وِچ وِچ
ایہو جیہے تھڑے نہ ہوون
تاں اتھاں وڑیا بندہ تے بندہ رہوے ای نہ
آہو سچ، ایہہ وی تے دس نا شپیا
جے تُوں خان نہیں، تے کون نیں خان
شپا: تُونئیں ای دس نا، پِنڈ وِچ کون نیں خان
ونگار: اوتھے تے اوہو ای نیں جیہڑے ویکھے نیں لوک نے آپ:
کھادا پِیتا جان دا تے
رہندا جو سو خان دا
بہوں ترِکھے نیں ایہہ خان، کُھنڈے کرنے پَینے نیں - ایہہ کون پئی آوندی اے
بِینی: کیہنوں پئی مِلنی آں میں بھاء
شپا: سنجاتا نہیں تُدھ؟ ایہہ ونگار ای بِینیئے پھینیئے
بِینی: اوہو جیہڑے رل کے وکھو وکھریاں آہراں نُوں سانجھی واہل بنا دیندے نیں، کیویں کریندے او ایہہ کار تُسیں؟
ونگار: ساڈے کول تے بس تنوار ای اے بِینی جی، سانجھی کار وِچ سواد دا رس گھول دیندی اے- آکھو سوادی رس ہوندا ای سانجھی کار وِچ اے- مَل دی کھار کار نُوں سانجھا رہن ای نہیں دیندی- لس نُوں لاس بنا چمنبوڑدی اے تن من نُوں -
تنوار للکر وی بن ویندی اے جے لوڑ پوے تے، آؤ ویکھیئے نا اوہ وی
مالک: اوئے کون او تُسیں
اِک راہک: سارے ونگاری آں
مالک: میں تے وگار نہیں دِتی کِسے نُوں
راہک: اساں رل کے کار اِک بئے دی پئے کرینے آں
مالک: سارا کم چَوڑ ہو ویسی- آپو اپنی نِبھاؤ تے جاؤ گھرو گھریں
راہک: چودھری جی ویکھو نا کِنا نِبڑ گیا اے
مالک: ویکھنے آں پر ٹھیک نہیں ایہہ
راہک: جیہڑی موج بنی اے اوہ مانیں تاں جانیں
بِینی: ویکھن نُوں تے اوہ پیا للکردا ہا تُہانُوں - پر اصلوں سانجھی کرنی لڑی اے اوہنوں
راہک: ایہہ، ایہو جاچ اے
بِینی: جیوے سانجھ سدا
راہک: جیوے تے جوالے