نوِیں سُنی جے مُڑ مُڑ ہوندی؟
اکھے شاہ جہان نہیں
تاج محل ایہہ تُساں بنایائے
گِن گِن دسن اسانوں
پڑھ پڑھ باہروں آئے سیانے، ‘‘ویرو
ہتھ تساڈے ای آہے جیہناں
گھڑ گھڑ مَرمَر
کالے لیکھ وِچ جڑ چمکائی چِٹیائی
اج ہتھ تساڈے ای نیں
جِس حُسن اوس دا جادُو جگ تے کر کر نواں جگانائے’’
کون سُجھائے ایہناں نوں
دھر گنبد منارے سِر تے ویچن بادشاہی دیاں ٹِکٹاں
کیکن کار اساڈی ہو گئی
اوہ ہتھ اساڈے ناہے بھلیو
دستانے آہے شاہ جہانی
چَھتر چھاں دے اوہلے اساڈی کُتر ویتر کَھل پائے
کیویں دَسے ایہناں نوں کوئی
جُگ جُگ گُھٹ گُھٹ وِس جو ہڈاں وِچ لہندی آئی
روم روم وِچ چس جِس نویں اُسار دی لاہی
کار اوہدی تاں آہی
اکھ اکھ وِچ کون کوئیاں دی درشن مام دا دھرنا
آہر اساڈا کیوں ہونا ہا-
دَکھ بگانی پھیر اکھیاں وِچ خلقت کرن اندھراتی
جاتا نہ تُساں؟
گھوٹ کاڑھ کے درس وار پی پلیو
کِسے ویلے جے پھولو اپنے آپ نوں تاں
سانوں متے پچُھانو