”ست ونت بائی دا ویلا“ اِک پڑوار اے- سنگت وِچ ایہہ پڑھی وچاری گئی- گل بھرپُور ہوئی- پر جوڑ دی پڑھت اننت ہوندی اے- جِتنی واری دھیانو، اندروں نویاں سونویاں سینتراں سردیاں نیں - آؤ اِک جھات ہور پا تکنے آں - ست ونت بائی بیٹھی تے مُڈھوں چکلے وِچ ای ہوئی- جتھے نار دا تن وِکدا اے- مُل ویلے دا اے- جِتنا ویلا گاہک لوڑے اوتنا مُل تارے- پر تن وِچ من وی ہویا- ایہہ نار دی مرضی اے اوہ تن نال من رلاوے نہ رلاوے- یا کتنا رلاوے، کتنا پروکھے رکھے- گاون نچن وی تن دی کار اے، سِکھی مانی- ایہہ وی چکل وپار وِچ وکاؤ وست اے
ست ونت بائی چکل وپار دے دُھر اندر رہ کے ایہدے توں اصلوں وکھ کیویں تھئی تے کیوں - جاپدا اے اوہنوں اوہدی واپر نے سُجھا دِتا اے جو چکل وپار مل ویہاروں وکھری کار نہیں سگوں اوہدا اصلا اے- ایہدے اندر ای مل ویہار دی ناہی لُکی بیٹھی اے جیہڑی بندے دی نویں ہوند دی آہی اے- ایس سُوجھ نے ست ونت بائی نوں اوہ کرنی دِتی اے جیہدے نال ست ونت ست وان تھئی اے، سچ دی دان دی سکل- اوہدا بھانڈا اصلوں نویلا تھی گیا اے- ہُن ویہاری اکھاں کن اوہدے کول کوئی نہیں - اوہ جو سُن ویکھ سکدی اے اوہ ویہارواناں دے وسوں باہر اے- اوہنوں بُوہیوں باہر گلی وِچ لنگھدے دو گبھرُواں دی ٹور نے ای دس دِتا اے جو ایہہ دوئے اوہدے آپنیاں وِچوں نیں - غدریاں نُوں تے پھیر بھگت سِنگھ نُوں وی لُکایا سرکاری اکھ توں اپنا جان کے- ویہاریاں لیکھے ست ونت بائی انھی بولی اے پر سہج لیکھے اوہ سُجاکھی سُنیتل اے- اوہ باہروں لنگھدیاں نُوں بنا ویکھیوں اوہناں دی ٹور توں ای پچھان کے اندر سدوا بہالدی اے ساہویں تے گاون سُناوندی اے- گھنٹہ گاون سُن کے اوہناں دونہاں اِک دُوجے ول ویکھیا اے تے ست ونت نے اپنے سنگی مستُور نُوں آکھیا اے، جا چھڈ آ ایہناں نُوں جِتھے جانا چاہوندے نیں - جانے ایہناں نُوں کھڑ اوس جا تے جِتھے پُجن دی تانگھ ایہناں دے اندر جاگی اے- ست ونت دا گاون کیہ اے- ایہہ اوہدی ویہار اُتھلنی کار اے، نوِیں بندیکی جُون نال اوہدا میل اے- اوہ دینہہ پر رات ایہہ گاون گاوندی اے- نویں جُون دا جاون ماندی اے اپنے اندر باہر- ایس گاون نُوں اوہا سُندے نیں جیہناں دے اندر نواں جِیون مانن دی سدّھر سری اے- سو ویہار وپار دے بدھے ہُن کوئی نہیں آوندے ست ونت دے ویڑھے- کوئی سازئیے اوہدے نال نہیں ساز وجاوندے- کیہ وجاون، اوہناں دیاں ہتھاں وِچ سار ای نہیں ایس گاون نال رلن دی-
ست ونت اوہا راگ پئی گاوندی اے جیہڑا وارث شاہی رانجھے دی ونجھلی وِچوں گُنجاردا اے- اگنت راگ وسے نیں ایہدے اندر- کُل راگ اِک نویں انہت جُڑت وِچ رل بولے نیں - ست ونت آپے ہیر تے آپے رانجھا اے- تخت ہزاریاں جھنگاں رنگپوراں وِچوں نواں جہان اُسارنہار-
ست ونت دا سنگی مستُور وی ست ونت دا انگ اے- اپنی محمودی ہستی تج مستُور ہویا- اوہدا ستر اوہدی نویں ہوند نُوں کجدا اے- پر اصلوں اوہ مست اے، بے ستر نہنگ- اوہدا پتہ، اوہدا ناواں سرناواں ست ونت ای اے-
ایس پڑوار دا واری (پڑواری آکھ لؤ) دیس دی ونڈ مگروں آپنے بیلی مہندر کولوں وچھڑ گیا اے پر ایس پڑوار نُوں چیتے کر سناوندا اوہ مہندر نال رل گیا اے تے اوہنے ست ونت دے گاون نُوں مُڑ اندر ڈھالیا اے- اوہنے انارکلی دی گلی نُوں جوڑیا اے ست ونت نال- کیونجو کِسے زمانے نویں انارکلی چکل بزار آہی- واری لیکھے انارکلی دی نویں اجوکی وپار سِکھر ہوند چکل بزار ای اے، پر ہُن اوتھے اوہدا تروڑ ست ونت کوئی نہیں -
ست سچ ہے، اصل حقیقت، دان، کرنی دی، لین دین دی سانجھ- ونتر بنتر ہے- نویں ونتر اُنن ویہاری ونتر اُدھیڑن ہے- نوِیں بنتر بناون مَل ویہار نُوں ڈھاون ہے- ونت مالک اے- ست ونت مالکی دی اُتھل اے-