''آپس دی گل اے بھائی والی جو ہوئی،
ورھے چھماہِیں لاونے آں آپاں
لام ڈورِیاں،
کمیاں نُوں صاحباں دے گلے پوانے آں
مُک مُکا کرا کے
دوہِیں پاسِیں کم سُتھرا کے
ناں ناواں کماونے آں بندا سردا، جِیون جوگا،
ونّ سوَنّ پواڑے وِچ وِچ بندے ای نیں،
ہُن ویکھو پا پڑھیاں سُدائیاں
نواں جَھلّ گُھکایا اے کمّی کاریاں وِچ
اکھے اسیں ہُن مالکی اصلوں مُکاونی اے جگ توں
ہر شے سانجھی کراونی اے،
چھڈے نیں اسیں بُلارے
دسّو وللیاں نُوں
جے دھن وان اگوان نہ ہوون
باہِیں کندھاں پیر فرش کیویں ہوون،
روندے او جیہڑے ویلے نُوں
اوہ اندر وِچ ای اے
ہولی ہولی اوہنے مُونہہ وکھاونا اے،
جو کِسے منگنا اے آپے ای گھر پے جانا اے
ویکھو نہ کم چھوہے مارکس لینن تے ماوزے تُنگ دے
اج پُورے کیویں پئے ہوندے نیں
وِچ رُوس چِین دے،
تُسیں بھائی جی روز سوختے
پھُوک بُلاریاں اندر بھرا ای چھڈدے او،
پمپ وی نویں سو نویں تہانوں
مِلدے ای رہندے نی