باتشاہ: کیہ پئے کریندے او ملکہ عالیہ
جیہڑی چاکر رکھاوناں اوہنوں دِھی بنا
مِلکیت شاہی ناویں اوہدے لاوندے او،
ملکہ عالیہ مُونہہ ایہناں دے مِٹی دے
تھوبے ہوندے جے
ساڈے حُکم دی چھاں ہیٹھ آ کے
نین نقش کُجھ جُڑ ویندے نیں
جیہو جیہے وی ہوون
ملکہ: کیوں عالم پناہ
مِٹی دے ای بدن اساڈے وی نہیں؟
باتشاہ: اوہ ہور مِٹی ایہہ ہور ملکہ عالم
ملکہ: اوہناں دی گڈ اُگائی رِدھی کھاندے
اوہناں نُوں ہور کریندے
آپ اس ہور ہوئے آں
باتشاہ: جاپدا اے تینوں لبادہ ملکہ والا
ہُن پیا چُبھدا اے
ملکہ: اندروں لہہ گیا ہویا اے
تُوں وی لاہ چھڈ اندروں
باتشاہی والا
باتشاہ: پتہ ای مُڑ کیہ ہوسی
ملکہ: کیہ؟
باتشاہ: باہرلا وی نہ رہسی
ملکہ: ہو مِٹی نال مِٹی
پانی نال ہو پانی
وت سرس ہووئیے
اسیں دوئے ہانی