ماڑِیوں جیہڑی سڑک بیاری جاندی اے
اوہدے وچ اک ڈیڑھ میل دی ٹکڑی اے
جیہڑی پُرسلات اکھواندی اے
لنگھدے سواری وال نوں ایتھے آپنے گناہ یاد آوندے نیں
پُرسلات
تائے ساب داد دی بیلداری اے
ایتھے بے مذہبے پتھراں نوں ٹَھلنا
پِھسدے پہاڑ نوں تھمنا
انھے روڑھ نوں راہے پاؤنا
تائے ساب داد دا کم اے
پُرسلاتوں اک ویلے اکو ای جِیپ ٹرک مساں پَھس کے لنگھدائے
لنگھنہار نوں تھاں سِر ڈکنا
گلّیں دِل پرچاء واری سِر چھڈنا
تائے ساب داد دا کم نہیں
پر اوہ سٹھاں ورھیاں توں ایس کم نوں آپنا کم بنائی آیائے
پُرسلات دے دندے لکڑ گھڑ کے بُتیاں لاونا
بُتیاں نوں چِٹی کُوچی پھیر کے رات جگاونا
لے برف دے لاہ کے سیالیں
چِیکنا پنڈا پُرسلات دا
آوندے جیپ ٹرک لئی تیار کراؤنا
تائے ساب داد دا کم اے
تائے دے پُتر پوترے دوہترے
نکیاں ہوندیاں کجھ چِر اوہدے نال نوکری دیندے نیں
وت پنڈی مری مجُوریاں لوڑن ٹر جاندے نیں
تایا پہلی لام چ لڑیا ہا
فوجی ڈسپلن اوہدی گُڑھتی اے
فوجی جیپ دی گھوکر سُندیاں سار اٹنشن ہو جاندائے
گینتی اِنج نپدائے جیویں رَفل ہووے
پُرسلاتوں پار لنگھا کے جاندی جیپ نُوں
بوری ہو گئے بُوٹ بھوئیں تے مار سلوٹ کریندائے
دو بُتیاں نڈھیاں گڈیاں نیں
(تائے ساب داد دے ہتھ کجھ کنبن لگ پئے نیں
ہُن نڈھیاں کولوں کم کراوندئے
آپوں داء دسنے تے رہندائے-)
پر ایہہ دو بُتیاں اوہدے اصلوں چِت نہیں لگیاں:
''خبرے کد جچ آسی جوانی چڑھیاں کی
گھنٹہ گھنٹہ کُٹنے او بُتی کَھلنی نہیں
اُرانہہ کرو ودان جوان جہان تے تکو''
تائے دے ہتھ کجھ کنبے نیں
اوہدے متھے مُڑھکا آ گیائے
کنچی کترے چُونے رنگ بھروٹیاں اُپر پگ دا وَل کجھ ڈِھلا ہو گیائے
پر اوہدی اِکو سٹ نے بُتی اٹنشن کر چھوڑی اے
ہتھ کنبن چھڈ گئے نیں
اوس پگڑی سانبھ کے لڑ نال مُڑھکا پُونجھ لیائے:
''ہُنے افیسر لنگھسی کوئی
بُتیاں تک کے کیہ آکھسی ساب داد کی کیہ بنیاں''
سٹھاں ورھیاں توں تائے دے پُتر پوترے دوہترے
اوہدے مونہوں ''افیسر'' سُن کے
سہج سبھا کجھ اندروں بَھر جیہے جاندے سن
تائے دے مونہوں ''افیسر'' سُن کے
آپنے گراں وچ بیٹھے بیٹھے
چھاونی کمپ افیسر جادو نگری
مایا لگیاں وردیاں کسّی بُوٹ کَھڑکنّے چاڑھی
حکم منیندے رہندے سن
اج تائے دا پڑپوترا کالا بولیائے:
''تایا اساں کی دتا کیس افیسر جیہڑا کھس لیسی''
تائے دے متھے مُڑھکا آ گیائے
ہتھ مڑ کنبن لگ پئے نیں
کالے ول اوس پہلوں گھور کے تکیائے
وت چُپ کر کے
اک وَٹے اُتے پیراں پرنے بہہ کے
بُھنجے انگلی مارن لگ پیائے