میں ڈاکٹر صاحب دا کرائے دار آں
کمرے غسل خانے دا
بِیبے بندے نیں دانے جم پَل بَھلے ویلے دی
گھسی گھسِیٹی گل میں کر چھڈی اے تُساں آکھسو
بھلا ویلا بھلا کیہڑا ہوندائے بندہ پچُھے
ہر ویلے دی اپنی بھسوڑی چل سو چل اے میلہ
ڈبیاں نوں ٹکر مار کے انجن اگے ریڑھدائے
اِکدوجے نوں ٹکرو ٹکری ڈبے ریڑھی آوندے نیں
اِنجن دا نہ ڈبیاں نوں پتہ اے نہ مینوں
ڈاکٹر صاحب نوں ہووے یا تہانوں میں آکھ نہیں سکدا
سیانے بندے نیں
ایم بی بی ایس نیں کھرے، ولیتی ڈِگری کوئی نہیں
بورڈ تے اپنا لاوندے ای نہیں کِتے
پریکٹس اجے وی سنت نگر جے
اوسے ای گھر وِچ جیہڑا ایہناں دے والد صاحب نے
لُدھے ہانیوں آن الاٹ کرایا
سر توں لیکے پیراں تیکر کوئی بیماری ہووے بُڈھے بچے دی
ماڑی موٹی فیس لیندے نیں اِکواری
دین جوگے نیں جیہڑے اوہناں کولوں
وِچ وِچ مفت وی ویکھی آوندے نیں
پلیوں پیسے دے دِتے جا دُدھ شُدھ پی تُوں
ورھیاں بدھی محنت نال حلال کمائی جوڑ جاڑ کے
ایس امیر کالونی وِچ کوٹھی پائی
امیر کالونی ہُن کُجھ کُجھ غریب جیہی وی ہوندی جاندی اے
امیری ہڑھ پانی
ٹوئے بھرے ایتھے چھڈ اگیرے لنگھ گیا اے
والد صاحب ایہناں دے درزی دا کم کردے سن
دُکان انارکلی وِچ مِل گئی سی سنتالی وِچ
درزی عام نہیں سن
لُدھے ہانے چھاونی وِچ اوہ
سُوٹ وردِیاں سِیوندے آئے سن انگریزاں دِیاں
انارکلی وِچ مُنڈے کالج دے چھوٹے افسر بعضے وڈے وی
گاہک پرانے آ جانے
آپ وی اوہناں ٹائی لائی رکھنی
انگریزی وِچ ماپ لینے
ایہہ ساریاں گلاں مینوں میرے تائے سُنائیاں ہوئیاں نیں
تایا گوانڈھی یار ایہناں دا سنت نگر وِچ آہا
تِن کوارٹر کوٹھی وِچ نیں
اِک خنساماں اِک ڈرائیور
بُڈھیاں دوہاں دِیاں اندر گھر دا کم شم کر کُر دیندیاں نیں
تیجے کواٹر خالی پانی دِیاں بوتلاں ڈبے
بکسے دوائیاں والے
مرمت والیاں کُرسیاں میزاں پئیاں ہوئیاں نیں
مینوں آہندے نیں نوکر رکھ لئیں ایتھے جدوں وی رکھنا ہووے
میرا نوکر موٹر سائیکل ہویا
میں اوتھے کھلیاریا ہویائے
سُن نہ لوے
چلنوں نہ کر جاوے میں اپنا یار ای کہناں اوہنوں
ڈاکٹر صاحب دا فائدہ مینوں ایہہ وی اے نا
میری صحت دا خیال بڑا رکھدے نیں
میری کیمرہ مینی نال اوہناں نوں سروکار نہیں
بچیاں نال تصویر لہا تے لیندے نیں پر متھے وٹ جیہا رہندائے
خبرے مذہبی وٹ کوئی پِچھلے ویلے دا اندر رہ گیائے
یا اپنی نِکی جیہی گوگڑ توں کُجھ شرمندے نیں
کیمرہ مینی میری اصل وِچ فلم بناون دے ٹھرک دی نیٹ پریکٹس سمجھو
ایس ویلے رُزگار اے بھاویں
کنیز فیسٹیول دا خیال تے آونا ای ہویا نہ نہ کردیاں
سینمیاں اگے لگیاں قطاراں وی اکھوں پرے نہیں ہوندیاں
پر ٹھرک ٹھرک ای ہوندائے سمجھو
ڈاکٹر صاحب تے آکھدے رہندے نیں لاء1 شاء کر لے
ویکھو گل تے نِکی جیہی اِک دسنی آہی تہانوں ایویں لمی کیتی آوناں
سَپ تماشے والیاں وانگوں
مِینہہ ایتکاں لما ای وسیائے ایس ریٹائر کالونی وِچ
تہاڈے پاسے دا پتہ نہیں
کوٹھی بھلے سمے دی بنی ہوئی اے
میٹریل اِک نمبر اے
ڈاکٹر صاحب ایہدی صحت دا دھیان وی ہر ویلے رکھدے ہوئے
پِچھلے ہفتے کُجھ گھبرائے جیہے آئے نیں
مینوں نال لیونیں
کِچن دی کندھ وِچ ڈب جیہا سِل دا
میں کیمرہ سدھا کیتا اے آہندے نیں نہ نہ ایہہ نہیں
نالدے واش رُوم وِچ کھڑ کے ڈب اِک ہور وکھائیونیں
مینوں لگا ایہناں ایکس رے ویکھ لیائے
کوئی وڈی بیماری اے
دوپہرے چھت تے کھاڑ کھاڑ جیوں لگی
دو دیہاڑے لگاتار
تیجے دیہاڑے شامیں میں آیاں
میرے نال آئے نیں موٹر سائیکل والے کواٹر اندر
اِک لمی جڑ ولھیٹ کے رکھی مینوں کھول وکھالی نیں
گُجھی جیہی مسکار، آہندے نیں
‘‘ہندو درخت اے پِپل ایہنے جڑوں مُکائیاں ای مُکنائے’’
ہفتہ لنگھ گیائے
ایکس رے کچن واش رُوم دے صاف آئے نیں
کل میں کواٹر موٹر سائیکل رکھیائے
نِکا جیہا پِپل دا بُوٹا چُرھوں 1 آکھدائے ‘‘جھاء’’
میں ڈاکٹر صاحب نوں کار چوں لہندیاں نال لیا وکھایائے
‘‘ہندو درخت دی داڑھی تے اسلامی جے’’
پتہ پِپل دا مَل میں آہناں،
ڈاکٹر صاحب دی گوگڑ ہولی ہولی ہلی اے
ہسن روون دا پتہ اوہناں دا گوگڑ توں ای لگدائے
پر ہسّے نیں کہ روئے ایہہ پتہ نہیں لگن دیندے
بابے حسن دِین خنسامے دی ووہٹی بُوہے کھلوتی ویہندی اے
‘‘ایہدا دِین مذہب نہیوں فوٹو صاحبا’’
فوٹو صاحب اوہ مینوں کہندی اے
ڈاکٹر صاحب اوہنوں بھین برکتے آہندے نیں میں پُھپھی برکتے
‘‘ایہہ وڈے وڈے رُکھاں دے سِر وِچ اُگ کھلوندائے سہج سبھا ای
پکیاں چھتاں وِچ لت لمکاوندا ای
پکیاں کندھاں وِچوں دند کڈھ ہسدا ای
ایہدا کم ای بنی بناتی ڈھاون ہویا’’
ہلدی گوگڑ ڈاکٹر صاحب میرے موڈھے ہتھ رکھ باہر آئے نیں
‘‘تُوں سچی ایں بھین برکتے’’ آکھ کے اندر ٹُر گئے نیں
1- لاء: قانون (ایل. ایل. بی)
1 - چُرھ: نُکّر-