مینوں جیل چ اوہنے سُنائی سائی رُوپی نے
کٹھیاں دوویں اسیں پھڑیاں گیاں ساں سنّ اٹھاٹھ وِچ شپیا،
اکھے پیو میرا سیدو افسر ہا سرکاری
دس گیا مردی واری
پُتری داگی آہے تاہِیوں دروغے لگے اسیں
داگی کوئی آپ نہیں ہوندا
اگلے کریندے نی
دانداں نوں کر سانھ پھیرن لئی چونکاں وِچ،
کر کر نوِیاں گھراں والیاں
پِنڈاں تھاواں وِچ روے لوار وسیندے نی
لوار کون ہوندے نیں رُوپی میں پچُھیا
ٹھگ سیدو پھڑمار فراڈئیے دو نمبر تقریری
اکّ لویرے،
میں وی پچُھیا سی پیو نوں اوہنے ای دسیا سی،
سُن نا اگے،
پیو میرا آہندائے کیہ دسیئے تینوں داگ دروگا
جُھوٹھ فارسی
ویدن دیسی،
داگی کرن ہی آہی نوکری ساڈی
کر کر عمر نبھائی او پُتری،
داگے داگ دھوئیاں نہیں لہندے
دارُو ہِکا اوہا ای آ
چُوڑھ چُڑیل جیہڑا مینوں دسیا
'بنھ لیائے پلے'، آکھ میں اوہنوں مگروں لاہیا
سرکاری وردی دا
پلہ بھلا کیہڑا ہوندائے،
آکھ گئی او ''داگ ٹوہ اپنا دروگا
تند چھوہ اندروں
رات دے پِچھلے پہر سُنِیں جیہڑا راگ چِھڑے
دینہہ چڑھدے نوں لہہ ویسی ہا داگ دروگی وردی''
چُوڑھ چُڑیل؟
اوہ وکھری کہانی او پُتری
کُڑی اوہ سَوکھے کھتری گھر دی
کولے ورگی
چُوڑھ چُڑیل اوہنوں آہندے آہے گھر باہر دے سارے،
وڈی ہوئی گھروں نِکل گئی
کِسے حکیم دا سُن رنگ گورا کراون لئی،
کتے دیس بدیسے راہ جاندی اوہنوں آکھ گئی کوئی بُڈھڑی
'رنگ ایہہ کُڑئیے سُرجن دا ای'
چُوڑھ چُڑیل سُن پرت پئی
جھاڑو جوڑ لیا
سِر تے تگاری دھر لئی
ساری عمر مُڑ لاہ لاہ کوٹھے ونجراں 1 اوس وسائیاں
1- ونجراں = بنجر زمیناں -