''میں نہیں اَنّو
تینوں تیرا عاشق لہور لیایا اے''
''میرا عاشق؟
اوہ کون اے سَیدو ماسی؟''
''تیرا شوق پڑھائی دا،
میں تے ویاہی آئی ساں ایتھے
تائے دے پُتر نال
ہٹی چلیندا ہا،
پنج ورھے اوہ ہٹی تے بیٹھا،
گُذر گیا اوہ میں ہٹی تے بہہ گئی
سونکن میرے کھیہڑے پے گئی''
''سونکن وی کوئی آہی تُہاڈی؟
اساں تے ماسی نہیں سُنیا''
''اوسے تے ماریا کھسم میرا
میرا گھٹ تے اوہدا بُہتا،
وڈی شونکن اے
ہر ویلے اوہنوں ٹُمبے گودے:
کوٹھی وڈی ہووے
دُکان مال روڈ تے
مال بنا، مِلّاں لاء،''
''کِتھے ہوندی اے ہُن''
''ہر تھاں، گشتی
ٹکّرسی تینوں وی''
''میرے کنوں کیہ لینا سُو ماسی''
''عاشق تیرے نال یاری لاونی اے اوہنے''
''پڑھائی دے شوق میرے نال؟''
''وڈی کُپَتّی رنّ ای اَنّو،
آ بہنا اوہنے ہٹی تے میرے نال،
ہر گاہک نال اکھ مَٹکّا
نہ ویکھنی عُمر نہ شکل،
مینوں ویاہ کراونا ہور پیا''
''کدوں سَیدو ماسی؟
پِنڈ وِچ تے کِسے نُوں پتہ نہیں ایس گل دا''
''پتہ اے ساریاں نُوں،
ویاہ نہیں نا کروایا میں،
عشق لایا اے، سِروں پیروں لاہ،
ویاہ کرایاں عشق رُس کے ٹُر جاندا اے،
کیہ دساں تینوں اَنّو
بڑا ہُشناک ای،''
''لایا کیہدے نال اے''
''وَیری سَونکن دا''
''ناں سونکن دا تُساں نہیں دسیا''
''مَل وانی''
''مُلوانی؟''
''بن جاندی اے اوہ وی وِچ وِچ کھچری''
''تے وَیری ایہدا؟''
''سَکھنیر،''
''سَیدو ماسی ہُن سمجھی آں بھیت تُساڈا،
عاشق میرے نال ایہدا ٹانکہ مُڈھوں ای اے،
ایہہ رل اوہدے نال لہور لیائی اے مینوں''
''آپے نبڑنائے اَنّو تُوں ایہدے نال''
''اوہ تے مینوں پتہ ای اے
پر تُسیں جانُو او ایہدے پُرانے
دسو نا ایہدا اَگّا پِچھا''
''مُد مُدِیدیں اَنّو ایہنے جگ تے راج گُھکایا ای،
کھسم کریندی اے ون سوَنے
ناں اوہناں دے اگے دھریندی اے
آپ کھلو کے پِچھے کسب کریندی اے،
کدے بھوئیں والاں دی رانی آہی
رج رج کھادا پورھیا ایہنے راہکا کمیرا،
بُھکھ ای تت ست ہویا ایہدا
بُھکھ اَن لہنی نِت ودھنی،
مگروں ویاہے ایہنے وپاری،
ہُنڈری ہِیناں دا کتیا گھڑیا
کَوڈی بھا کھڑیا
ہیریاں دے مُل ویچیا،
لاہا جوڑ کے کیتی راس،
راس دا لاہا
لاہے دی راس،
وپاری گھاڑُو ہو گئے
مہارانی مَلوانی تھئی گھڑیال،
ہر چھاتی تے تخت وچھایائے ایہنے،
آپے وست تے آپ بزار
آپے نقد تے آپ ہُدار
آپے کار تے آپ سوار''
''تِیوِیں کیوں تُساں ایہنوں کیتائے؟''
''سَونکن جو آہی میری،
اُنج تے ایہدی جِنس نہیں کوئی
آپے نَر تے آپے نار''
''بہُوں مہِین سُنجان اے تُساڈی''
''میری کیہی، میرے عشق سکھنیر دی او''
''عشق تہاڈا مینوں وی ٹوہندا پیا اے ماسی''
''ایس عشق دی ایہو پچھان ای اَنّو،
جیہناں نُوں چھوہندا اے کھار نہیں کھاندیاں اِکدوجی کنوں
رل کے ماندیاں نیں ایہنوں ماواں دِھیاں،
نالے کھار کاہدی
اپنا تے کُجھ رہندا ای نہیں پھپھے کُٹناں دا
تن من تِھیندا اے سانجھ دُوار''