فرید بھنڈار

برما چندر جماتی ہا ساڈا

ناں اپنے نُوں نِت بُھڑکائی رکھنا اوہنے،

کدے آکھنا ”وکھرا مُلک ہاں میں

مینوں اپنا انگ نہ سمجھو،

لَین دین جے کرنا اے کوئی پہلاں معاہدہ کرو“،

کدے اوہنے بَرما فارسی والا ہو وینا

”بَرما آکھو مینوں

سِر نواؤ، ساڈے اپر ہیں تُوں،

سُرج دِنے تے چن راتِیں

جُھرمٹ تاریاں دا

اپنا نصِیبا جانن کیتے مینوں ویکھ کے لایا کرو حساب“،

یاراں آپو اپنے ناں دا پیچا اوہدے نال پاونا

کدے ہس پِھٹک کے مگروں لاہونا،

وت باہر ٹُر گیا برما

ناواں ڈھیر کما لیایا

وڈا پلازا چاڑھ بہہ گیا،

اِکدن مِلیا آہندا اے ”یار

دِل کردا اے کدے

خیرات کردیاں سارا بنایا

لانبھے بہہ کے پُوجا پاٹھ کراں،

کدے سوچناں نہیں، سکول کالج ہسپتال پوا دیناں

غرِیباں واتے،

مُڑ خیال آوندائے

کیتی ایہہ کئیاں، دُنیا تے اوہا دی اوہا ای رہی،

بے ناواں ہوون وی اوڑک ناں بناون ای اے

اصلوں ننگے ہوون وی اِک ہور لبادا پاون ای اے“

میں آکھیا جو دِل کردا ای کری تُوں آ،

ہو سکدا اے روز دا ڈِٹھڑا کوئی رُکھڑا

اِک پل تینوں اصلوں ہور ہو جھاتے،

ٹھہر مہینہ مُڑ مِلیا برما

عجب انند وِچ ہا،

”ہویا ای اوہا“

”کیہ“

”جو تُدھ آکھیا ہا،

پڑھی لِکھی اِک کُڑی

دفتر میرے کم کریندی آہی

چھڈ ٹُر گئی،

اِک دِن اصلوں نویں رُوپ وِچ لنگھدی دِسی،

میں کھلہار کے حال پچُھیا

آکھن لگی میں اُتھلک1 جُوڑی2 وِچ پئی کم کرینی آں،

سُن اندر میرے ہَلَّن اچرج اِک آیائے

جو کُجھ ہا سبھ جُوڑی اُتھلکاراں دی نُوں میں دے دِتائے

بے ناواں ہو اپنے آپ وِچ آیا ہاں،

ٹوہ چھوہ ہُن گُم ناماں دی

میرا موکھ دوارا اے“

1۔ اُتھلک= اُتھلن والی، اُتھل لیاون ہار- 2۔ جُوڑی= پارٹی، ڈھانی، جماعت-