فرید بھنڈار

اچرج ویل

بھریاں رُکھ پرواراں اُپر پسری کھڑی اے،

پتر پِپلیئے

کُولے ملُوک پر،

پُھل پیازی

وِچ چِٹیائی پانی

نالو نال نُہال1 کلیاں نوں ہَولا پُھل کرے،

کلیاں ہے ای پُھل نیں، ان کِھڑ کھیڑ اچنبھا

پتلیاں پتیاں وستر

وِچ رتاکُ گوڑھیاں ننگ پیازی لچھیاں،

ہیڑ ہے مدناں 2 دی

رس چِھک ڈولدیاں 

مَڑھنے نیں خبرے کتنے ایہناں مانے3 اجے

جیہڑے اگیت لُٹاون آئیاں نیں 

گھنیاں تے کُڑیاں نیں 

وِچ وِچ کوئی کوئی ہے وڈیری ماں ماسی،

اِک بھئور وی کالا کولہ

ڈِگ ڈِگ کملا بھؤندا پیا اے

آیائے مدھ تے کہ مدناں تے،

کلیاں نیں کہ گھڑیاں اگُونہیاں؟

کھریاں انبراں چوں لَس جھلکار1 اَلَستی

سانوں 

ان کھیڈیا حال کِھڈاون آئیاں نیں 

1- نُہال= نہوا کے- 2- مدن= شہد دی مکھی- 3- مانے= ماکھیوں دے چھتّے (مانا= ماکھی چھتہ)-

1- جھلکار= جھلکار کے-