فرید بھنڈار

میل لیٹ جے گھنٹہ

آؤ ویٹنگ رُوم وِچ لا دئیے

جانائے جانائے؟

گڈی آون توںپہلاں تے نہیں جا سکدے

کہ جا سکدے او؟ نہیں

تُسیں آکھو میں جانائے جانائے

گڈی ہووے نہ ہووے

جے گڈی نِکل جاوے تے پھیر

پھیر وی آکھ سکو گے جانائے جانائے؟

ٹیشن لنگھ جانے نیں کئیں تُہاڈے آکھدیاں نوں

کئیں شہر تے کئیں دریا

ہتھ چھڈ جانے نیں ٹاہلیاں ککلی پا

تُسیں ایتھے کھلوتے آکھی جاؤ گے

میں جانائے میں جانائے

آکھی جاؤ پر آکھی جاؤ

میں کیوں آکھاں نہ آکھو

میں زمیندار آں کاکا میرا ورکشاپ وِچ کم کردا سی

ایہہ ہڑتالاں ہوئیاں تے میں اوہنوں چٹھی پائی

پُترّ شہر دے لوک شرارت بازی

چُپ کرکے کم لگا رہیں

بہت شریف جے مُنڈا شوہدا مُونہے وِچ زبان ای ہے نہیں

رولے وِچ تے وڑدا ای نہیں اوہ

میں اوہنوں چٹھی پائی

پُترّ شہر دے لوک شرارت بازی

سائیاں نال نہ متھا لائیے

اوہنے تے کدیں اکّھ نہیں اُچیّ کیتی

لین تے لمّاں کیویں پے گیا پُلس والے نال سِدّھا کِیکن ہوپیا

کِیہ دسّاں جی دل دریا دِیاں میں کِیہ دسّاں

ساری عُمر میں پِنڈوں باہر پیر نہیں پایا

پر کاکے دی میں جیل دا سُن کے لہور شہر جد آیاں

تے دل آکھیا فتح محمدا لگ گئیاں نی لاماں

کوئی پُچھے پئی دھولا جھاٹا کیہڑیاں لاماں کِتھے لگیاں

پر کِیہ دسّاں جی میں کِیہ دسّاں

دِل دریا اسیں انتارو

سر تے بھار میں دھرناں تے مینوں خورے ہو کِیہ جاندائے

میں آہناں

میری بگّی داڑھی ولّ نہ ویکھو

دھر لئو جو کُجھ دھرنا جے اجّ میرے سر تے

کوئی پُچھے اٹھیانی پھیرا کھسم خدائی

کھوہ دے حقے لسّیاں چھڈ کے ایتھے کِیہ پیا کرنائیں

کِیہ دسّاں ہُن میں کِیہ دسّاں

دل آہندائے بس فتح محمدا اجّ ہَنّے یاں بَنّے

سر تے بھار میں دھر کے آہناں

تُوس دے ڈبّے تُوس دے ڈبّے

کِنّا کُو بھار اے انّھا بولا

جیہڑا تیری دھون لِفا لئے

دِل دریا اسیں انتارُو