فرید بھنڈار

ہر جی دوالے اُسری دینہہ دوال1

دینہہ کیہ ہے

فجرے مَل دی جنج چڑھاون

جمدیاں نوں کر سربالے

گلی گلی نچ گاون سہرے سِٹھنیاں

گھر گھر رِیتا دسترخوان وچھاون

سادھ چور دا رَل مِل رِدّھا

بُھکھ مُتنجن قبضہ قِیمہ

مڑھ محرابی کُفر کوفتے خلق ولیمے ڈاہون

تھلے دبی نینہہ رات

نینہہ کیہ ہے

دینہہ دوال مُڈھ دھرن بُھچال

سانجھ بے راجی دھرتی اُتے عشق سنبھال2 کماون

ازل ابد لنگھ کھیڈن فقر دھمال

1۔ دوال: دیوار، فصیل-

‘‘دِن اگے دھرو دوال نی’’

(کافی بُلھے شاہ)

1 - سنبھال: سنبھالا، ہوش-