جِتھے میں جانا اگے میرے ایہہ گل جانی:
''آئی جے چُھٹڑ ناظم حکمت دی''،
بس اِک واری مِلی آں اوہنوں
اوہ وی جیل وِچ
اپنا آپ اوہنوں دے آئی
ہتھاں وِچ اُتار لیائی چھوہ اوہدی
جیہڑی رلی اوہنوں لائی،
اوڑک اوہناں مینوں وی جیلے لاہیا،
رکھیونیں اندر تیراں ورھے
ایتنا ای اوہنوں رکھیو ہا نیں آخری واری،
اوہ چُھٹیا تے نسیا مُلکوں
رہندا ویلا سوویٹ یونین وِچ لنگھایُس
میں نِکلی، سوویٹ یونین تاں آہی کوئی نہ
لوء ڈھونڈیندی ناظم حکمت دے پِنڈ ٹُر گئی
ویکھے جو مینوں راہ ولا جاوے
اِک بُڈھڑا لنگھدا آکھ گیا کن سن وِچ
''نس اِتھاؤں
مُڑ جیلے نہیں سٹنا اوہناں
'گواچ گئی' دُھما
گوا تینوں چھڈنا نیں،
ہر کوئی اِتھاں سُونہا ای سَن مینڈے''
میں اوتھوں نِکلی پُلس نے گھیرا گھتیا
''جُلو
تہاڈے مُلک بدر ہوون دے آڈر آ گئے نیں''
عراقیں جیہڑی پارٹی راج کاج چلیندی آہی اوس ویلے
جانُو میرے وی آہے وِچ
اوہناں سد گِھدا
میں بغداد آئی
جائیں پرانیاں ٹوہ ٹوہ پئی ڈھونڈینی آں،
چھوہر اِک
وِیہاں پنجھیاں دا ہوسی
ترِکھا ترِکھا ٹُردا سہج سبھائیں آن میرے گل لگّا
''میں دو مہینے تُرکی ساں
تیری اُڈیک وِچ
جیلوں نِکل تُوں ایتھے آ گئی ایں''
ہولی ہولی نال ٹُر پیائے،
''تینوں ایہہ دُنیا وارے نہیں،
ایہدی تھاویں
جیہڑی وساون لوڑنی ایں
اوہ اوہناں نوں وارے نہیں
جیہناں دی ایہہ ہے،
ڈک رکھیا نیں تینوں تیراں ورھے،
پر واس تیری
واء دے اندر گئی رلدی
میرے جیہیاں دا ساہ بن گئی''
''کِتھوں آیائیں''
''لہور تُوں سُنیا ہوسی''
''بھگت سِنگھ پھاہے لائیونیں اوتھے''
''جیل ہُن اوتھوں چا کھڑی نیں
اوہدی تھاویں شادمان آباد اے''
''سُکھ وستی؟''
''میرے لئی دُکھ وستی اے
سُکھ وستی تے تُوں ہیں''
''کِتھے وینا ای''
''ہر دم تیرے نال ای رہنائے''
''جیل وِچ''
''نہیں، تیرے وِچ جِتھے وی ہوویں''
''عُمر ویکھ اپنی تے میری''
''جو تیری سو میری''
''ناظم حکمت ترئی ورھے پہلوں دا''
''نہیں، ترئی ورھے کٹ جیلوں نِکلیا''
''میں ایتھے منصور دی جائیں پئی ڈھونڈینی آں''
''تُوں ہیں آپ منصور''
''آہو سُولی تیار اے میری اوہناں کول
اناالحق میں بھاویں نہیں آکھیا
جاتو نیں پئی آہندی اے:
'ناظم حکمت میں ہاں' ''
''میں تُوں تھی
ہاں سُولی کان تیار''