لارنس باغ پہاڑی اُتے جتھے مور دا پِنجرائے
پئی اے چھلی مکھیری خالی
اوہا ہونی اے
ہیٹھاں وڈے سمبل تھلے پرسوں جیہڑی بھالی
کون لیایائے
اِل ہونی اے
ٹھیکیدار دے اڈیوں چا کے ایتھے دھر گئی مور سرہانے
دوپاسیں گھر نیں بدامی ویہلے
اندر جِھلّی چِٹی چدّر ہیٹھ نِکے نِکے بی نیں کالے
جیویں دھر بجری اُتے مومی گھر کھلہارے نیں
چِٹی چدّر اندرے اندر نُوری دسترخان ہے سانجھا
ململ کُولا ریشم کرڑا،
نہیں اوہا نہیں
سمبل والی وِچ بجری کوئی نہیں
خورے شہت وِچ وی فرق آہا کہ کوئی نہ
بھیت وسیلے دا ہے اِکے ہے کرنی دا
رہیے چھلّی وِچ تاں پائیے
ٹھیکدار نوں پچُھیائے آہندائے اوہ نِکی ایہہ وڈی مکھی
اوہ پنج سو ایہہ تِن سو بوتل
اوہ دماغ ایہہ دِل لئی کامل