فرید بھنڈار

[جڑانوالے کولوں لنگھدی سڑک جیہدے وِچو وِچ کندھ اے دو ہتھ اُچی دو ہتھ چوڑی- دونہہ پاسِیں پِنڈورِیاں 1 جنیاں دابڑے گوہے دے چائی کھلیاں نیں، پاتھیاں جھپا جھپ لاوندیاں - سڑک دا اِک پاسا آون لئی اے، دُوجا جاون لئی- اساں گڈّی اِک پاسے سڑکوں ہٹ کھلہاری اے، لہہ کے پنجے کندھ ول ہوئیاں ہاں]

رَتّو: نی پاتھیاں ایس کندھ تے

اِک جنی: پھوسڑاں 2 جو ہوئیاں، پھوس مَلن دیاں گِجھیاں

رمّی: پھوسڑاں دا کم اے ایہہ؟ دونہِیں پاسِیں ایتنی ٹریفک- ٹرک تے ٹرک، کاراں تے کاراں، وِچ گڈّے تے ریڑھے- تے تُہاڈے دابڑے بے فِکرے-

دُوجی: انی کیہ کرئیے، کِتھاں تَھپ سُکائیے

سیتی: آہو رمّی- گھراں دیاں کندھاں نُوں سُتھرا وی تے رکھنا ہویا نا

پہلی: نہ اڑئیے، ایہہ کوئی گند تے نہیں نا- ایہہ تے دات اے ساڈِیاں سنگیاں دی

جینا: اوہ کون نیں

تریجی: مجِھیں گائِیں ہور کون- نالے بھینا، کندھاں گھراں دیاں کچ پکیاں نیں، بے اِتباریاں

دُوجی: ہوئیاں جو آپو آپنیاں، ہر کِسے دِیاں -

رَتّو: تے ایس کندھڑی تے اَیڈا وساہ

پہلی: سانجھی جو ہوئی وِچکار کَھلی

چوتھی: دونہہ پاسیں وگدے ایہدی ٹوہ ٹوک توں ترٹھ کے وِتھ تے ای رہندے نیں

پنجویں: دونہہ پاسِیں کھلوتے رُکھاں دیاں چھاواں وی ایہدیاں بھیتناں 1 نیں، ایہنوں پاتھیاں سیکن سُکاون توں ہٹکدیاں نہیں

بِیرو: سیک ایہدا دان جو ہویا

1۔ پِنڈوری= پِنڈاں دِیاں وسنیک- 2۔ پھوسڑ= نکَما، سُست، ڈراکل، ٹِمِڈ، کَووَرڈ-

چوتھی: بھا2 دی تگ3 ونڈیندا پاتھی پاتھی نُوں - جانُو ہو تُساں وی اڑئیے، پتہ اے سانُوں، سنگیاں جو ساڈیاں ہوئیاں تُسیں - کھیڈ کِھڈاون رل سانُوں آوندِیاں او ہر بہارے رہت بہت ولا کے شہر دی، ساڈے بابے اِسحاقے4 دے ڈیرے

دُوجی: سیک ایہہ ساتھن ساڈی پہلوں جوڑیندی اے تن من وِچ اپنے، ول ساکوں سدیندی اے

سیتی: اکّی تھکّی سیک دی

رَتّو: نہ سیتی، سیک تے ست ہویا نا ایہدا- ایہہ اپنے ست دا دان کریندی اے دونہیں پاسِیں نچ کے

دُوجی: ساکوں ساڈی واہل1 دا چیتا کریندی اے: گِھنو نی سئیو ایہنوں بھا کرو

رمّی: گھر کھڑو تے ٹُکر نُوں لاؤن لا کھاؤ کھواؤ

پہلی: آہو، اوہا تے بھا اے- تُرت اسیں آونیاں ہاں سدّا سُن کے ایہدا- بھا سار سوار کے لاونی جو ہوئی اساں، نانہہ، لاونیاں تے پئیاں ہاں

جَینا: کیہنوں

دُوجی: سہنسیاں 2 اپنیاں نُوں پہلوں - جیہڑے جکوتکی وِچ سانُوں جکڑی رکھدے نیں اُنڈیاں کر کے- سِدھیاں ہو کھلوون نہیں دیندے ڈاڈھ دبَلّ دے ساہویں اِک پَل وی

چوتھی: سِدھیاں ہو کھلوتیاں 3 تے بھا ساڈی نے لُوہ دینے نیں چوکھٹے مَلّ دبَلّ دے

پنجویں: تے ڈھے وینے نیں حُکم چُبارے شہراں دے

پہلی: لہہ اوہناں چوں آونیاں نیں ساڈیاں ساتھناں ہو کئیں

بِیرو: جیویں اسِیں آئیاں ہاں

ترِیجی: تے کھیڈ اساڈی سارِیاں دی نے مچ کے سواہ کر دینا اے بھیت ایہہ اسیں تُسیں والا

1۔ بھیت= فرق- 2۔ بھا= اگ- 3۔ تگ= سکت-

4۔ اِسحاق محمد- اگوان پورھیت پاہی جُوڑی (مزدور کسان پارٹی)-

1۔ واہل= ذمے واری، رسپونسیبِلٹی- 2۔ سہنسا= شک، ڈر-

3۔ پاتھیاں بالن لگیاں سِدھیاں کھلہاریاں جاندیاں نیں، اُتوں سِر جوڑ کے-