ستّاں ورھیاں دی اے مانو
میں اوہنوں بیڑی بنا کے دیناں کاغذ دی
کدیں جہاز بنا کے دیناں،
اِک دن آہندی اے ہور وی کُجھ بنانا آندائے تہانوں
''ہاں، دن رات، بنا دیاں؟''
''آہو، بناؤ''
میں کاغذ پھڑ دوہرا چوہرا کرکر ویکھاں
کدیں اوہ بیڑی بنن لگ پووے کدیں جہاز پُرانا،
''مینوں بُھل گیائے مانو
کل بنا دیساں میں چیتا کر کے''
اوہ اُداس جیہی ہو سکول دے کم وچ لگ گئی،
سوچاں کیہڑی پڑھاں کتاب جیہڑی ول دَسے،
پُچھاں کِسے پُرانے کولوں
ویب سائیٹ کوئی پھولاں،
اگلے دِن اوہ آ گئی اکھاں وچ شرارت جیہی
''لیاؤ، دِن رات بنایا جے؟''
میں مُڑ کاغذ پھڑ کے ٹھپن کھولن بہہ گیاں
اوہ دھیان نال ویکھے پئی
اِکدم میرے ٹھپّے نوں پُٹھا کر کے آہندی اے
''ہُن ویکھو''
میں پُٹھے نوں مُڑ کے ٹھپیا اِکدم بنیا اگے آ گیا
''لے مانو دِن انگلاں اُتے چڑھالے
بند کر کے کھول، سیاہی لا کے رات بنا لے''
مانو آہندی اے
''ایہو ای اے جو تُسیں بنانا بُھل گئے سو؟''