آڈ دا پانی
نہ دریا نہ اساں سمندر
نہیں برفاں دے جائے
لمبڑاں دے کُھوہوں گِڑ کے نِکلے
یاں انگریز دی کڈھی نہروں بیلداراں دے ٹورے
وڈّھی دے کے کُھلے کرائے موگھے تھانیں آئے
نہ وَس روڑھن نہ وَس بوڑن
وارو وار کیاریاں وِچ پھرائے
کنیں پئی اے چوا چوا دریا بَندائے
اَتے ہوندائے سمندر تربکے اندر
نِت کُھردی جے کَوڑ نہ چھڈیئے
کوٹھے بھردیاں پَیلِیاں کلّر کر سکنے آں
جے دِل کڈھیئے
ایتھوں مر کے وت رَل بدلِیں ورھ سکنے آں