گُزر گئیاں نال گل
آؤ جمیئے وت نال بھراؤ بَھینو
دُکھاں دِیاں اتھاہاں وچوں بانہیں چا ہتھ نپو اساڈے
بند غاراں وِچوں تُساں تے ہُن کوئی سگویں پرت نہیں آونا
چِیکاں تُساں دِیاں نہیں اونویں پرت سُنیونِیاں
دھرتی ہیٹھ دبائے ویلے وِچوں اساں ول نظر کرو
پَیلِیاں واہن والڑیو
فکر دی بیڑی پہن پنیری اندر کھلیو بَھلیو
چرکھے ڈاہن والڑیو
چاکو اجھک اجھک وگ چھیڑدیو
گواں تے ٹنگیو راجو
پھٹڑ ہتھ لہارو
سار سوارے بھانڈیاں وِچ ای ٹِھیکر تھئے کُبھارو
واریاں بدھی دبیاں دُکھاں نال تربکا تربکا بھرو پیالہ
نویں جیون دا
اپنی رَت نال بھرے سیاڑ وکھاؤ سانوں
آؤ دساؤ ایہہ اوہ جا ہے جِتھاں کَھل تساڈی
چھانٹیا ں نال اُکھیڑی گئی
اِک پلک وگار وسارن پاروں
ٹُھکیا ہا لہ ویلے سِر نہ تارن پاروں
سانوں پتھر وکھاؤٹِیسیاں اُپر جِتھوں تِلکے پیر تساڈے
لکڑ وکھاؤ اپنیاں سُولِیاں کان جیہڑی تُساں آپ گھڑی
وٹے رگڑ جگاؤ بُجھ گئے دِیوے
کوڑے دِسن پَھٹ چٹِیندے
لہو تساڈے نال کُہاڑے لِبڑے
سِیتے بُل مُڑ جوڑ کے کھولو
کرو کہانی لمی رات وِہانی دی
اساں تُساں دے نال ای جانو ٹُردِیاں ایتھے آ کَھلِیاں ہاں
اسانوں دان کرو
سہج تے آس تے پانی
دان کرو ہَٹھ گھول کرن دا
دان کرو سانوں سار پہاڑ اگ مُکھیئے
دیہی دیہی سانوں جوڑو مقناطیس بنو
پِھرو اساڈِیاں ناڑاں اندر
ساڈے مُونہہ کھولو
رچو لہو وچ ساڈے
بولاں وچ بولو
(پابلو نرودا دی اِک کافی وِچ وادھا گھاٹا)