فرید بھنڈار

کالج پڑھنے پئے

ناں نال گورمنٹ لگا ہویائے

کوئی پُچھے کتھے پڑھدے او

چھاتی چوڑی کر کر مُنڈے دسیندے نیں

جیہڑے سکولوں دس کر کالج آئے ہاسے

گورمنٹ اوہ وی ہا

مُڑ اِک زمانہ آیا

کیہ دیال سنگھ کیہ اسلامیہ ایم اے او

سارے گورمنٹ ہو گئے

کئیں چھاتیاں چوڑیاں ہور ہوئیاں

کئیں سُنگڑ گئیاں

نِکیاں ہوندیاں بابے حیاتے نوں پُچھیا ہا میں اِکواریں

‘‘گورمنٹ کون اے بابا؟’’

‘‘سِر تے بیٹھی ہوئی او میرے’’

‘‘دِسدی تے نہیں’’

‘‘دِسدی مینوں وی نہیوں’’

‘‘کیہ کردی اے؟’’

‘‘مِنٹ مِنٹ پِچھوں گَور’’

‘‘کِس گل تے؟’’

‘‘قابو کیویں رکھنائے ایس حیاتے نوں’’

‘‘کیوں، کیہ کیتائے ایہنے؟’’

‘‘کیتا تے کُجھ نہیں کر نہ دیوے نا’’

‘‘کیہ’’

‘‘سِدھا ہو نہ کھلووے

مالک اپنے ساہویں’’