چھابا اساں ریڑھی تے دھریا
ریڑھی کھلہار کے کر لئی ہٹی
کیہ بھا پیا ایہہ دھرن کھلہارن
کیہڑی کیہڑی دِید مُراد دی بھر بیٹھے آں چٹّی
ہُن تے سمجھو پِچھانہہ نوں دھکا اگانہہ اُلارا
اِکو ای سبق سپارائے
بس اوہ گل ہے وِچ ہور جیہی
کیہ دساں ویکھو نا
پرچھاواں جیہا اِک پُھمنی پاؤندا لنگھ جائے
‘‘آ چھج کراں تیرا چھابا، ریڑھی روڑھ کراں’’
تریلی آ جاوے
پر جھٹ ٹھہر کے جاپے جیویں کوئی یار گوایا
ہو پراہونا آون آون پیا کردائے
نہیں روز دی گل نہیں
کدے کدائیں
ورھے چھماہیں سمجھو