تُساں نُوں، ساریاں نُوں
رات دے چُپ جِیؤ
جیہناں ہتھ مینڈا پھڑیا وِچ ہنیرے
ان بجُھنے چانن دیو دِیوئیو
قطاراں تاریاں دِیو
تُساں ہی جیون دے ورتاوے
گُجھیؤ مینڈیو وِیرو
تُساں نوں ساریاں نوں
میں آکھناں
نہیں شُکرانے تھورے کوئی بھر سکدے صِدق دے جام،
نہیں،
تُساں ہو رُت آونی چیتر بہار دے جھنڈے
ٹھاہریں اپنی سنبھل کھلے
جُھلسو تُساں تاں ورھسی جگ تے سُرج پُھہار
ایہو سوچناں
اوہا ہویا ہاں میں جو تُساں ہو
ساد مرادے پھُل نروئے
اوہا بھورا مِٹی آٹا گاون
اوہا واہر سہج
سار ہے جیہنوں کِتھوں دی ہاں تے کِتھے جانا ہے
میں کوئی دُراڈا ٹِل نہیں
نہ کوئی جواہر ڈُونگھا گڈیا
جیہڑا پٹ کے تُساں نہ پرکھ سکو، بُوہا اوہلے
کالی روٹی
اتے مینوں جدوں تُساں جی آئیاں نوں آہندے ہو
تاں اپنے آپ نوں ای مِلدے ہو
اوہا پروہنا نِت کُٹ کڈھیا
نِت نِت آپ جوایا،
سبھ نوں ساریاں نوں
جیہناں نوں میں جاندا وی نہیں
جیہناں کدے مینڈا ناں وی نہیں سُنیا
جیہڑے اساڈے لمیاں دریاواں دیاں کنڈیاں تے وسدے نیں
پہاڑاں اگ اُبتنیاں ہیٹھ
گندھک چھاواں تانبے دِیاں وِچ،
ماچھیاں پاہیاں نُوں
نیلے ہِندیاں نُوں
شیشے ہار لشکدیاں ڈناں کندھی جیہڑے بیٹھے نیں
تُساں نُوں
جیہناں اچیتی رکھی مینڈی اُڈیک
میں وی وِچ تُساں دے ہاں
منن ہار تے گاون ہار تُساڈا
(پابلو نرودا)