اسیں آپنی تے محنت لینی سی لئی اے
اصل تے لوکاں نوں کم دیوائے نیں
کھان کماون لائق بنائے نیں لکھاں لوک نکمے،
سانوں پتہ اے آہر دے اوہلے ویہل اے
ویہل اک مُگھ اے
ایسے مُگھ وچ ساڈیاں وڈیاں دیگاں لاہیاں
نفل وظیفے کیرے
متاں لیڑے پاڑن گُم سُم لوکیں،
آپنے ننگ چوں لنگھدے
رب دی کندھ وی سنھ نکلن،
ولگناں وچ لُکائیاں ولگناں ہُوڑ1 اُلنگھن اینویں
اینویں کاغذ بدناں اُتے لگن انگوٹھے میلے،
اج جُگاں پُرانے انھے مُگھ وچ اسیں جگائے نیں ٹی وی
وی سی آر اُتارے نیں مگرے
رنگو رنگ وچھائیاں نیں اخباراں
ڈائجسٹ رسالے واڑے نیں،
متاں ویہل گواچے کملے لوکیں
"آپے رانجھا ہوئی"کُوکدے
اینویں ہستی آپنی بھن نکلن
کموں کاجوں جاون وانجھے
مُڑ راتو راتیں چَونے ہوندے ٹبر ایہناں دے کیہڑا سانبھے