دبی دبی گَڑ گجّ بدلاں دی ہو سکدی اے
مینہہ ورھن توں پہلاں
یاں بھوئیں امب دی گھُوکر
دھونس دُراڈی توپاں دی وی پَل پَل نیڑے ڈُھکدی
چڑھت لڑاک جہازاں دی وی
تُسیں مننا نہیں ایہہ ٹریفک سڑک دی اے
جیہڑی ایتھے لارنس کمپنی باغ یا باغِ جناح دے اندر بیٹھا لکھدیاں
میں پیا سُنناں
کل وڈا دن اے
دُھپ سیالی کھِڑی ہوئی اے گھا تے
رانگلے لیڑے ورھے ویہار لئی سانبھے پہن کے
بِھٹیاں گھراں دِیاں کالیاں کُڑیاں
ایتھے ہُم ہماکے آونائے
اُتوں کل جمعرات ہوئی
تُرت مُراد تے شام قوالی ہونی اے
ہُن اکو جَنا ای پُوری پارٹی ہوندائے
نال ریکارڈڈ میوزک وجدائے
اجکل پَل پَل لوڈشیڈنگ ہوئی
ویکھو کیہ رنگ بندائے
جیہڑے سفیدے نال ڈھاسنا لائی بیٹھاں
اپنی عُمر ہنڈائی کھلوتائے
چھیتی ہی ایہنے وڈھیا جانائے
سُکّا بے چَھل کُولا پِنڈا کَنڈ لاون لئی چنگائے
میں ایہدا دینا دے نہیں سکدا
ایہہ لکھیا میں ایہدے ناویں کرناں
جے منظور کرے