شام دیہاڑی کر اساں مِل وچوں نکلے آں
خیال آیا ئے ایہنوں پُچھئے کون ایں
مِل وچ کم نہیں کردا
کِتھوں آؤنائیں کتھے جانائیں،
جدوں دے کم تے لگے آں
شامیں نال اساڈے ہوندائے
چُپ چاپ
ٹُر نالو نال کتے گئم سُم وچ ہنیرے ہو جاندا ئے
اساں پُچھیائے کتھوں آؤندے او کم کیہ کردے او
اکھے سرگھی اوہ مینوں نپ کھڑا کردے نیں:
"دس توں شامیں نال جانائیں مزدوراں دے
گلاں کیہ کردے نیں اوہ ساڈے بارے"
میں نہیں بولدا،آہندائے اک اوہناں چوں:
"ٹھانے دیو نا بولے"
دُوجا آہندائے"پُلس بُلایا بولن نہیں ہوندا بھائی جی
کُھلے دا کھولن ہوندائے "
تریجا آہندائے:"کم تے ڈاہو"
سُندا گندا اے نال اوہناں دے جو وی رکھے اندرے
کم تے ایہدے باہر اساڈے آونائے
اندر نوں ماری رکھے جندرے
جیہڑی بانگے اساں جگایائے
اوسے اوہناں سوانائے"
اساں پُچھیا ہو کون تُسیں وڈیو
اکھے دِن،
ساڈے وچوں"دھن"کِسے سُنیا
"دین"کِسے کِسے "جِن"
جیہنے جو سُنیا دوہرا مُڑ اوہنوں پُچھیا
اکھے جو پئے چاہو بناؤ بھلیو
دِن میرا ناں جے
باہروں نال اوہناں دے ہوناں
اندروں نال تُساڈے
کتیا تُساں ہزاراں دا اوہ ترے ولن دوال تُساڈے
ایہہ مینوں نہیں وارے
اندر میرا جے رات تُساڈی
جے آکھو اکواری کھول وکھائیے اوہناں نوں