فرید بھنڈار

بس سٹاپ دے ساہمنے ٹھانائے

بس سٹاپ تے دُھپ اے

ٹھانے چھاں اے

بالی چھاویں ہو کھلوتائے

جدوں بس آوے گی

آپے سڑک کراس کراں گے’ چڑھ جاں گے-

تِن جنے چھاویں ہور کھلوتے ہوئے نیں -

دو دھوتیاں والے اک پتلون تے بُشرٹ والا

بشرٹ والا آہندائے:

میں تے اوہنوں داء ماریائے ہویائے

ہُن اوہدی دیر اے ہلن دی

ہلیا نہیں تے ڈھٹھا نہیں 

وکیل دا کم اے ڈھانا

ڈھا کے پھڑانا

اگوں تہاڈا کم اے

سر مٹی وچ رگڑو ڈُھوئی رگڑو-

دھوتیاں والے کھوڑ وکھا کے ہسدے

سجرے گھون کرائے سِر ماردے

''سانوں پتہ اے جی کہ'' آکھی جاندے نیں -

بشرٹ والا چلا گیائے تے بالی ویکھیائے

دھوتیاں والے دونویں اکّو جیہے نہیں'

اِک موٹی گِچی' سَنڈِھیاں لتاں والا اے

اِک دُنبے سِرا تے پتلیاں لتاں والا اے

وکیل دے سُننوں اوہلے ہوندیاں سار ای

سَنڈِھیاں لتاں والا بالی نوں آہندائے:

ککھ رہ نہیں گیا

ککھ رہ نہیں گیا کسے گل دا

سبھ اکدوجے نوں وڈھن پھردے نیں 

پُتر ماں کیہ بھین بھرا کیہ پیو دھی کیہ

ایس جدات نے چُھری پھیر چھڈی اے ساریاں گلاں تے

دُنبے سِرا وی سنڈِھیاں لتاں والے دے موڈھے اُتوں آہندائے:

''ایہہ خورے بنیاں کیہ نیں -

اگے وی جیوندے وسدے ای ساں کہ''

سَنڈھا آہندائے:

''ایہہ پاکستان نے مسلماناں دے مونہہ نوں لہو لا دتائے

اگے جداتاں ہوندیاں کدوں سن''

بالی آہندائے:

جیہناں کول وی ہوندیاں ہوسن اوہناں دے ڈھڈ وچ وِس وی گُھلدی ہوسی

دُنبہ آہندائے: ''ایہہ وی سچ اے

باہرو باہر برادریاں سن اندر وار شریکے سن''

''نہیں اودوں تہانوں رب یاد سی

ہن تہانوں رب یاد نہیں''

بالی مُونہہ بھواں کے ویہندائے

ٹھانے دے دروازے لاگے

سَج خضابِیاں کُنڈِھیاں مُچھاں ہیٹھ

پرانی جان پچھان دی مہین جیہی مُسکار دھار اے

چِلکنی گرگابی اُتے بوسکی دا کڑتا پائی

دونہیں ہتھیں ڈھاکاں اُتے دھوتی کُنج کھلوتا آہندائے:

''سبھ اعمال نیں تہاڈے

تہانوں رب یاد نہیں''

سَنڈھا کھوڑ وکھا کے ہسدائے:

''سانوں پتہ اے جی کہ''

دُنبہ سِری مار کے ہسدائے:

''بالکل سچ اے''

بالی آہندائے:

''جتھے جدات ہووے اوتھے رب نہیں رہندا''

سنڈھے کھوڑ لُکا کے نیویں پا کے

ادھ گجھ ہنگارا بھریائے

دُنبے بے ملُوما جیہا پچاکا ماریائے: 'سچ اے''

کُنڈِھیاں مُچھاں بالی دیاں اکھاں وچ پھر گئیاں نیں:

''توں اوہ تے نہیں 

کیمونسٹ جیہڑے آہندے نیں 

بے مذھبے''

بس آ گئی اے

بالی سڑک پار کرن لئی ودھیائے

اوہدے ٹریفک تَر کے پار پُجدیاں 

بس ٹر گئی اے

بس سٹاپ تے دُھپ اے

ٹھانے چھاں اے

سَج گھون کرائیاں بُڈھیاں سِریاں 

سَج خضابی کُنڈھی مُچھ نال

تکڑی دے پلیاں وانگوں بَجِھیاں 

اُتّے تھلے ہوندیاں نیں پئیاں 

بس سٹاپ تے دُھپ اے

بالی آہندائے: ویلے سِر تے سڑک پار وی آپنے آپ نہیں ہوندی

دُھپے ای کھلونے آں 

جے اگلی بس وی کُھنج گئی

تے خبرے پھیر آوے نہ آوے

(مگروں کئیں دن بالی نوں اِنج پیا جاپے

جیویں کوئی چیز گواچی ہوئی اے

یاد نہیں آوندا کیہ اے-)