مولانا روم دسیندے نیں
مِٹی کھانا اِک شکر وپارئیے دی ہٹی گیا
''شکر چاہیدی اے سجری''
''کتنی''
''پنج سیر''
''وٹّا مِٹی دا ای، آکھیں تے تول دیاں''
''تول دے''
''اُٹھ ہٹوانیا سودا لیاون اندر گیا
گاہک نُوں جَھس ٹُنبیا
اوہ وٹے نُوں نہوندر مار کے پھکّن لگ پیا
ہٹوانیئے تاڑ گِھدا
شکر کڈھن وِچ چِر اوہ لائی گیا
جِتنا ایہہ وٹا گھٹیندا اے اوتنا ای وکھر مینڈا ودھیسی،
مولانا روم دسیندے نیں
مِٹی کھانے سہی نہ کیتا اپنا ای گھاٹا پیا کریناں،
ہٹوانیا چِر لائی گیا
ایہہ وٹا کُھرچ کے کھائی گیا،
اگے مولانا جو لِکھیائے اوہ مِلدا نہیں
چھاپنہار متے کڈھ گئے نیں:
پرتیا ہٹی والا تے گاہک آہندا اے
''وٹا میں سارا کھا گیاں تینڈا
پنج سیر مِٹی دا کیہ لینا ای؟''
''دھرتی دی آہی پچُھ اوہنوں''
''پچُھی بیٹھاں،
آہندی اے میں مِٹی دے وٹے پیسے نہیں، مِٹی لینی اے
پیا سوچناں
جِتنی میں ہُن تائیں کھا بیٹھاں
ساری نویں گھڑا پرتاونی پینی اے''
''تے جِتنی ایہدے تُل دی ہُن تائیں میں پچائی بیٹھاں؟''
ہٹی اوہنے بند کیتی،
دوئے ٹُر پئے رل دھرت نال مِٹی نویں بناون،
اگے مولانا جو لِکھنا ہا آون والیاں شمساں تے چھڈ گئے