فرید بھنڈار

دو پتِیاں پُھلاں دِیاں

دونہہ پتراں دِیاں تلِیاں تے لتِھیاں،

اِک پکا ہرا اِک کچا ہرا،

ہلجُل واء نال پتراں نُوں کُتکُتارن1:

''اساں سجّ2 دا اَیر3 نہیں،

لالی رس ہے ساوَل دا

تُساں اساں کوئی غیر نہیں،

اَیپر4 ویڑھے پِرم5 سہج6 دے وَیری ہوئے

ویڑھ7 ایہناں نُوں کیتا اے ہیڑی8،

ہیڑ سہیڑ9 ہے ہُن ایہناں دی،

اساں چِتاون10 ایہا تُہانوں ڈَھلیاں''

1- کُتکُتارن= کُتکُتاری کرن- 2- سجّ= سجاوٹ- 3- اَیر= نشان- 4- اَیپر= پر- 5- پِرم= پیار-

6- سہج= 1) قدرت دا طریقہ، 2) اِکو جیہا ہوون- 7- ویڑھ= گھیرا (ویڑھن= گھیرن، ول لین، قبضے وِچ لین، اپنی مَل دی حدبندی کرن)- 8- ہیڑی= شکاری، (ہیڑن= شکار لئی گھیرن- ہیڑ= تعاقب)- 9- سہیڑ= 1) اپنے ذمے لیا کم، 2) رشتہ، تعلق، ساک- 10- چِتاون= چیتا کراون-