بِلیئے کالِیئے نی
نِٹھ بیٹھی ایں سِمبل پَٹاں وِچ
سُونہہ آل دوال دی لیندی لال اکھ جِھیتاں چوں
ایہہ تخت چَھتر ہے تینڈا
کہ چھاہ گورِیلے دی
پُوچھ پِھراوے رُک رُک اندر سانبھی کاوڑ
کیوں؟
نہیں وارے واہ ورتن ساڈی؟
گھر پَلیاں نوں دُدھ چِھچڑے سَت ویلے
نھاون نوں شَیمپُو
سَون نوں کُچھڑ،
ڈر تیتھوں رہندا اے
نحس وی ہوئیوں گورے آہندے نیں
جِتھوں لنگھ جائے گڑا پکی تے پیندا اے
نہ تینوں ہُسڑ نہ تینوں پالا
کیہ کھانی ایں کِتھوں
ڈر تیتھوں رہندا اے
نِکل پتالوں آئی ہوویں
ایہہ جگت پیالہ مُودھا مارن لَے کے کال1 دوشالہ
1 - کال: 1) کالا، 2) ویلا، 3) اوکھا ویلا، قحط، رِزق دی سوڑ، 4) لوک وار دی پاتر-
‘‘کال بلیندی اے’’ توں شروع ہوندیاں نیں کئیں واراں - ایہہ کال نشان اے نار دی گُجھی جگ اُتھلنی کاوڑ دا- نار جدوکنی نر پردھان مالکی دی داب ہیٹھ آئی اے ایہہ کاوڑ اوہدے اندر پلدی آئی اے- ایہو اوہدی مام ہے-