ڈر کاہدا جی جِیرا چاہیدائے
پر کوئی وساہ نہیں ایس مشین دا
گُر اینائے پئی چل سو چل
مَٹھّے پئے تاں گئے
جدّی پُشتی کم ای سمجھو
تایا ساڈا وانس دا کاریگر سی منّیا دھنّیا
اوہنے وانس پلّم کے چڑھ جانا اسمانیں
تے اُتّے پب دے بھار کھلو کے پیلاں پاونیاں
ہالیاں ہل چھڈ دینے
تے کنّاں چوں والیاں کھوہ کھوہ سٹنیاں کوٹھیاں توں کھترانیاں
میاں وی ساڈا پہلوں وانس تے چڑھدا سی
پھیر سرکس آگئی
تے صاحب نے اوہنوں تار دے کم تے لا لیا
اوہنے چُک کے چکری دینی ناجد لیڈی نوں
تے ساہ خلقت دا اُتلا اُتّے تے ہیٹھلا ہیٹھاں رہ جانا
پھیر اوہنے سٹ کے بُچ لینی لیڈی
تے لوکاں تاوڑیاں سیٹیاں مار مار کے تنبوُ بولے کر چھڈنے
ڈر کاہدا جی
پہلوں پہلوں رُگ جیہا بھریا جاندائے ڈِھڈ وِچ
تے دند نہیں میلیاں مِلدے
گُر اینائے پئی اُپّر اُپّر چڑھدے جاؤ ہیٹھاں پرت نہ ویکھو
ہیٹھاں ویکھیاں اِنج لگدائے
بس پبلک ہیڑھ دی ہیڑھ تُہاڈے سر تے چڑھ گئی
تے چُورما کٹیا گیا تہاڈا
میں تے آپ رہیاں نہ تار تے، مدراسی صاحب سی
بمبے، بصرہ، سنگاپور، افریقہ
سبھ تھاں پِھریاں بڑا اجاڑیائے
تِن سو رات وی لیندا رہیاں اج دا سمجھو تن ہزار، پر ایدھروں آونا اودھر جانا
اسیں رہنا سکھم سکھنے
جس ویلے کُھوہ میں لایائے
تائی میری اجے اللہ بخشے جیوندی سی
ایہہ پاکستان بنا کے گئی جے کرماں والی
آکھن لگی تاج مَھندیا جیویں
موت دا کُھوہ تے جویا ای پر ایہدے پانی نال شفا نہیں ہونی سانوں
جیہڑا تاپ تیرے تائے نوں وانس تے چڑھیا بِیبا
اوہ نہیوں موت دے کُھوہ وِچ ڈھلیاں لہنا
ہُن چا مچڑِک تیری جُھمر پاوندی اُپر اُپر جاوے گی
جس ویلے اُپروں لگی لو تے ہف کے ہیٹھاں آوے گی
میں اوہنوں ماسی ہونی آہندا ساں
میں آکھیا ماسی ہونی تیری گل نہیں ساڈے پلّے پینی
ہُن تے چھڈ بجھارتاں گور وِچ لتاں نی
ہّس کے آکھن لگی
تاج مھندیا جیون جوگیا ہاسے دی گل نہیوں
میں آکھ ویکھ رہی، تیریاں وڈیاں وی میریاں گلّاں
ہاسے بھانے کر چھڈیاں
اوہدا کاہدا نچن تاج مھندیا
کلّا باہر کھلوتا ڈر کے اندر وِچ جیہڑا وڑیا
اندروں گُمّاں کھا کے اوہو دُھر کوٹھے جا چڑھیا
دُھر کوٹھے تے کلّا نچے ہیٹھوں ویکھے ویہڑا
اوہ سُکیا نہیں ہوندا ہریا
بھانویں کُھوہ موت دا گیڑ گیڑ کے پِنڈا دُھونی ہو جائے
اکھے اوہو نچن روگ گواوے جیہڑا رل مِل نچّے ویہڑا
بھولیاں گلّاں پِچھلیاں ویلیاں والِیاں
لئو ہُن مشین میں چھڈن لگاں
اُتّوں پبلک کاہلی پیندی اے پئی
اُپّر ٹُر جاؤ دست پنجہ میں لینا آکے
جنگلا گُھٹ کے پھڑیو
تُہانوں ویکھیو تریلیاں آوندیاں