روز سوقتے لارنس جاون دا چس ہا،
رُکھ پُرانے یار
ہر پھیرے
نویں بریک سمجھوتی
جڑھ سار پروار وِچ دھر اوہناں مِلنا اگلوانڈھی،
دونہہ ٹِبیاں
دُھر اُپر بُلا
ٹوئے وکھالنے جیہناں دا ست سنبھال ایہہ چڑھیاں،
دسنا:
لارنس کُکڑ سیوَ ٹُھونگ کیویں کڈھ کھلہارے فضل سکندر
ناویں اوہناں دے سانُوں لایا،
اساں تے آوِیاں آہیاں،
مُڑ اندر دھر پکائے روڑے کڈھ وکھالنے اوہناں
حویل طبیلے محل محلے چاڑھ جیہناں کھلہارے،
ڈھل ہیٹھ میں ویکھنیاں
روز آوندیاں ڈھانیاں سیر کریندیاں
افسر کار وپاری مالک اخباری،
وِچ وِچ رُجھے مالی کمیرے
اِک دو ریڑھی وان پُرانے،
اِک دِہاڑے کرکٹ گراؤنڈ دوالے پھیرا لا میں مُڑیاں
تے اگے اُستاد دامن
دھوتی کُڑتا سِر پٹکا،
مِلیاں میں تے آہندے نیں:
''بس اِکو گل اے کرن والی،
ابھیاس''
آکھ کے لنگھ گئے نیں،
بنچ تے بہہ میں گولناں ارتھ ابھیاس دے،
نِجھاون دھیاون لوء لاون
مُڑ مُڑ کِسے آہر نوں، مُول سار نوں، چِت چیتے دا انگ بناون،
دامن دا جِیون جتن
ملّ ویہار اُتَھلّن دی ہر دم تازہ لگن
اکھیاں ساہویں آ گئی
سار ابھیاسی لُوں لُوں اندر سرن لگی،
مُڑ گیڑا پُورے باغ دا لاء
گھر پرتن لئی باہر نِکلن لگاں
تے اگے مُڑ اُستاد ہوریں:
''بس ہُن ایہو آس،
ابھیاس''
اکھیاں چار کر ٹُر گئے