“اساں مور منگا اِک ڈکیائے تہاڈے جوگا
آؤ پائیے چوگا
ڈکیا نہیں سگوں کُھلا چھڈیائے سَر سکندر ٹِبّی اُتے
)کیسائے ترجمہ ماؤنٹ دا، ترجمے تساں وی کردے او،
شہر وی ٹِبی ماؤنٹ بیٹن ای سی ٹکسالی
مُغلاں ویلے(
دو مرلے دا ویڑھائے جنگلہ
وِچ اے کُھڈلا بنگلہ
اندر ڈرائنگ ڈائیننگ بیڈ باتھ نیں وائٹ ہاؤس دے
ایہہ تہانوں پتہ اے شرعی پرہیزی پریذیڈنٹ اے کُل پکھواں دا
کُھلم کُھلا بُرا نہیں کردا کُکڑاں وانگوں
آل اولاد جد کرنی ہووے
سد مورنی اندر کھڑدائے سَیل فون تے
ویڑھا ایہدا دیوانِ عام جھروکہ درشن اکبر شاہی
پَیل ای تخت و تاج اے سمجھو
پَیل ایہہ چڑھیا
پر والی مخلوق جو کُل اے سجدے گئی اوہ
دِلاں تے راج اے ایہدا
ایہدی سیوا سانوں وی میوہ
چِڑیا گھر توں ڈیپوٹیشن تے اسیں ہاں ایہدے خادمِ اعلیٰ
لؤ ہور سنو، جس دِن میری سالگرہ اے
اوسے راتیں مینوں خاب کیہ آوندی اے
مورنی آ سرہانے نہیں میرے بہہ گئی!
اکھے بیان ریکارڈ کر
رنگ ایہدے نہیں
میں اپنے دِتے نی ایہنوں
ویکھ نا چِھٹ ہر رنگ دی میرے گاٹے گُجھی
اِک دِن مگر پیا ای میرے
اکھے ویکھیں نا میں باہر وی جانا ہوندائے
مِلن ملانا ہوندائے وزیراں بادشہاں نوں
پَیل بے رنگی پا مخول بناواں اپنا؟
آنڈے سَینا کم اے تیرا گھر بیٹھی دا
تُوں رنگ کیہ کرنے نیں؟
لاہ میں ایہنوں پوائے نی سارے
سَت ہریا سَت نِیلا
کالا چِٹا لال بدامی ہر ہر دے وِچ رَلیا
ہُن ایہدی مان نہیں آکڑ
میں جو چڑھناں تیرے اُتے
تُوں گولی میں رانا
گِدڑ ناہر1 بھگیلا آوے
میں تے سُکیاں جھاڑ جھلاں وِچ وڑ بہنی آں
دند پنجے توں لُکن لئی ایہنوں چمن غلیچہ چاہیدائے
اوہ وی میتھوں منگدائے
ماریا گیا تے کیس میرے تے ای کرنائے ایہنے
بیان ریکارڈ کر
ازخود ایکشن کر ایہدے تے-
خاب ویکھدا گِدڑ ہویاں میں وِچوں
باہروں بگھیلا
کھان مورنی جھپٹن لگّاں
پُوچھل میری داڑھی بن سترنگی
پَیل نہیں پاون لگ پئی!
شیشہ مینوں وکھائے مورنی صدر ضیاء الحق نوں
نالے مینوں چُنج اپنی نال سالگرہ دا کیک کھوائے
ہے نہ خاب عجوبہ
لؤ اوسے ہفتے گریڈ اگلے میں چڑھ گیاں
مور پنکھ دا سایا
تخت بہائی آیائے مُڈھ قدیموں”